Wi-Fi-ը ոչ միայն համացանցային միացում տարածելու հարմար միջոց է, այլև լրտեսման համար իդեալական տարբերակ: Անլար ազդանշանի օգնությամբ առանց մեծ ջանքերի կարելի է հետևել մարդու բոլոր շարժումներին, նույնիսկ եթե նա գտնվում է պատից այն կողմ: Համակարգը մշակել է Մասաչուսեթսի տեխնոլոգիական համալսարանի մասնագետ Դինա Քաթաբին: Այս մասին հայտնում է Gizmag-ը:
Արտասովոր մշակումը ստացել է Wi-Vi անվանումը: Համակարգը կարող է միաժամանակ հետևել երեք մարդու տեղաշարժին: W-Vi-ը ֆիքսում է մարդկանց շարժումները՝ վերլուծելով նրանց տեղաշարժից ստացվող ազդանշանների փոփոխությունները: Դրա համար կիրառվում են երկու ալեհավաքներ և ընդունիչ սարք: Ազդանշանները զտվում են համակարգչային հատուկ ծրագրի միջոցով:
Մշակողները հաստատում են, որ իրենց տեխնոլոգիան պարզ է և էժան: Այն կարող է կիրառվել փրկարարների կողմից: Այն պետք կլինի նաև ոստիկաններին:
