Աջափնյակ և Դավթաշեն վարչական շրջանների ընդհանուր իրավասության դատարանում Վարդան Աբրահամյանի նախագահությամբ շարունակվեց էքստրասենս Անի Մաջնունյանի սպանության գործի դատական քննությունը:
Ավազակությամբ զուգորդված դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 8-րդ կետով մեղադրվում է Մուշեղ Մխիթարյանը:
«Վեցերորդ զգայարան» հեռուստաշոուից հայտնի էքստրասենս Անի Մաջնունյանը սպանվել էր իր բնակարանում՝ դանակի բազմաթիվ՝ մոտ 50, այդ թվում՝ պարանոցին հասցված հարվածներով: Նրա դիակը հայտնաբերվել է 2015 թվականի օգոստոսի 5-ին: Նախորդ օրը՝ օգոստոսի 4-ին, ժամը 23-ի սահմաններում Անի Մաջնունյանին, ըստ գործի տվյալների, այցելել է սպանության համար մեղադրվող Մուշեղ Մխիթարյանը՝ «Յանուս» թատրոնի երիտասարդ ղեկավարը:
Դատարանը շարունակում է հարցաքննել դժկամությամբ ներկայացող վկաներին:
Դատարան էին ներկայացել երկու վկաներ:
Վկաներից մեկը՝ Արամը, ում նաև ընկերական միջավայրում «Մաքս» են ասում, գործով անցնող կարևոր վկա Աննայի ծանոթն է: Աննան հենց այս «Մաքսին» էր դեպքից հետո Անգլիական այգում հանդիպել ու վախեցած պատմել, որ ընկերոջ հետ գնացել էր էքստրասենս Անի Մաջնունյանի տուն ու այնտեղ տեսել է էքստրասենսի արյունաքամվող մարմինը, փաստորեն, ինքը տեղեկություն ունի կատարված սպանության մասին:
Վկա Արամը նշեց, որ որպես նախկինում «օրգանում» աշխատած անձ՝ Աննային խորհուրդ է տվել գնալ ոստիկանություն և պատմել ինչ որ տեսել է, քանի որ եթե իրեն մեղավոր չի համարում, ուրեմն վախենալու բան չունի և ոստիկանությանը պետք է տեղյակ պահի:
Այս վկան Աննայի հետ ծանոթացել էր Անգլիական այգում «Մաֆիա» խաղալու ժամանակ: Նա նշեց, որ Աննայի հետ վերոհիշյալ խոսակցության ժամանակ իրենց կողքին էր նաև իրենց ծանոթ Գևորգ Մ.-ն, ով այս գործով վկա է ու համառորեն դատարան չի ներկայանում:
Ամբաստանյալ Մուշեղ Մխիթարյանը հետաքրքրվեց վկա Արամի «մութ» անցյալով՝ ակնարկելով, որ նա նախկինում դատապարտված է եղել: Վկան չթաքցրեց, որ գողության համար դատվել է: Նախագահողը դիտողություն արեց ամբաստանյալին, որ հարցեր տա՝ մեղադրանքի ծավալից դուրս չգալով:
Մյուս վկան՝ Վահագնը, հերթական հարևանն էր, ով նշեց, որ Անի Մաջնունյանենց տուն շատ գնացող-եկող է եղել, բայց ինքն անձամբ նրա հետ չի շփվել: Վկան դեպքի օրվա մասին ոչ մի հետաքրքրական բան չասաց, նա նույնիսկ աղմուկ չէր լսել, նշեց, որ երևի քնած է եղել:
Դատարանը ոչ մի կերպ չի կարողանում ապահովել ևս երկու վկաների ներկայությունը, ում պաշտպանական կողմը ցանկանում է հարցաքննել դատարանում, մասնավորապես՝ վկա Գևորգ Մ.-ի մասին է խոսքը, ով ըստ վկա Արամի ցուցմունքի՝ իր ու Աննայի խոսակցության պահին կանգնած է եղել իրենց կողքին, հետևաբար, պաշտպանական կողմի համար հետաքրքիր է լսել նաև վկա Գևորգի վարկածը:
Դատարանը ևս մեկ անգամ բերման որոշումներ կայացրեց: Հաջորդ դատական նիստը տեղի կունենա օգոստոսի 22-ին:
