Բրիտանական Կոլումբիայի Վիկտորիա քաղաքի 15-ամյա դպրոցական Էն Մակոսինսկին աշխարհին ներկայացրել է նորույթ՝ մարդկային մարմնի ջերմությամբ աշխատող լապտեր, որը մարտկոցների կարիք չունի: Աղջիկն արդեն վաղուց է հետաքրքրվում այլընտրանքային էներգետիկայով: Նա գյուտն արել է գիտական նախագծերի դպրոցական մրցույթի համար, որոնք մեծ ժողովրդականություն ունեն ԱՄՆ-ում ու Կանադայում: Այս մասին հայտնում է ITAR-TASS-ը:
Աղջիկը ստեղծել է երկու նախատիպ: Երկու լապտերների ստեղծման համար անհրաժեշտ նյութերի վրա նա ծախսել է ընդամենը 26 դոլար:
Մրցույթին մասնակցության համար հայտեր էին ներկայացրել 120 երկրների 13-18 տարեկան հազարավոր երեխաներ: Եզրափակչի համար 15 նախագծեր են ընտրվել: Google Science Fair-ի եզրափակիչը կկայանա սեպտեմբերի 23-ին: Ընտրական հանձնաժողովի կազմում ընդգրկված են տարբեր երկրների գիտնականներ:
Հաղթողները կընտրվեն տարիքային երեք խմբերում՝ 13-14, 15-16 և 17-18: Հաղթողները կստանան 50 հազար դոլար՝ հետագա հետազոտությունների համար, և ազգային աշխարհագրական արշավախմբի կազմում 10-օրյա ուղևորության հնարավորություն դեպի Գալապագոսյան կղզիներ:
