Ռուսական RIA Novosti լրատվական գործակալության փոխանցմամբ՝ Իրանի արտգործնախարար Մոհամմադ Ջավադ Զարիֆը և Չինաստանի արտգործնախարար Վան Ին հեռախոսազրույցի ժամանակ քննարկել են իրանական միջուկային ծրագրի բազմակողմ համաձայնագրի իրագործումն ու Արակի ատոմային կայանի վերակառուցումը: Այս մասին նշված է Չինաստանի ԱԳՆ-ի կայքում:
Հեռախոսազրույցը նախաձեռնել է իրանական կողմը: Վան Ին հայտարարել է, որ համապարփակ համաձայնագրի ձեռք բերումից հետո Իրանն ու «վեցյակը» ակտիվորեն կատարում են իրենց պարտավորությունները:
«Ընդհանուր առմամբ պայմանավորվածությունների իրագործումն առաջ է ընթանում շատ դրականորեն: Հուսով ենք, որ բոլոր կողմերը հետագայում նույնպես կցուցաբերեն նման պատասխանատու մոտեցում, անդադար կամրապնդեն փոխադարձ վստահությունը»,- ասել է Վան Ին՝ ընդգծելով, որ Չինաստանը հետագայում ևս կառուցողական դեր կխաղա այդ գործընթացում:
Զարիֆն իր հերթին հայտարարել է, որ իրանական կողմը բարձր է գնահատում Արակի ատոմային կայանի վերակառուցման գործընթացի արագացման ուղղությամբ չինական կողմի ջանքերը: Նա վստահեցրել է, որ Իրանը պատրաստ է սերտորեն համագործակցել Չինաստանի հետ՝ համապարփակ համաձայնագրի իրագործման առաջխաղացման համար:
