Հարավարևելյան եվրոպական պետություն Խորվաթիայի՝ Եվրամիությանն անդամագրվելը կնպաստի տարածաշրջանում խաղաղության և կայունության հաստատմանը, և Խորվաթիան չի խոչընդոտի ԵՄ-ին այլ երկրների անդամագրմանը՝ նրանց հետ լարված երկկողմ հարբերությունների պատճառով: Այս մասին Ria Novosti-ի հետ հարցազրույցում ասել է Խորվաթիայի նախագահ Իվո Յոսիպովիչը:
«Չնայած որ Խորվաթիան չլուծված հարցեր ունի հարևան երկրների հետ, նա խորհրդարանում ընդունված դեկլարացիայով պարտավորվել է չօգտագործել բաց երկկողմանի խնդիրները՝ հարևանների ԵՄ ինտեգրումը բարդացնելու համար»,- ասել է երկրի նախագահը:
Վերջերս բավականին լարված են Խորվաթիայի և Սերբիայի հարաբերությունները: Այս երկրների քաղաքական ղեկավարները գործնականում պաշտոնական այցերով «չեն փոխանակվել»: Բացի այդ, Զագրեբը և Բելգրադը միմյանց ցեղասպանության մեղադրանքներ են ներկայացրել:
«Ես վստահ եմ, որ Խորվաթիան այս բոլոր բաց հարցերը հարևան երկրների հետ կլուծի խաղաղ և քաղաքակիրթ ճանապարհով»,- ասել է Յոսիպովիչը:
Հավելենք, որ Խորվաթիան ԵՄ անդամ կդառնա հուլիսի 1-ից:
