Վրաստանի նախագահ Միխեիլ Սաակաշվիլիի «Ազգային միասնական շարժում» կուսակցությունը որոշել է այն չորս թեկնածուներին, որոնք կմասնակցեն փրայմերիզին` նախագահական ընտրություններում առաջադրվող թեկնածուին որոշելու համար:
Ինչպես հաղորդում է Trend գործակալությունը, փրայմերիզին կմասնակցի խորհրդարանական փոքրամասնության առաջնորդ Դավիթ Բաքրաձեն, խորհրդարանի պատգամավորներ Գիորգի Բարամիձեն, Զուրաբ Ջափարիձեն և Շոթա Մախշիան: Այս մասին հայտարարել է կուսակցության առաջնորդներից մեկը` Գիորգի Վաշաձեն:
«Սա առաջին դեպքն է, երբ Վրաստանում նման ընթացակարգ է անցկացվում` նախագահի թեկնածուին ժողովրդավարական ձևով ընտրելու համար: Մենք դիմել ենք այդ քայլին, չնայած իշխանությունների կողմից ճնշմանը, և ցանկանում ենք սկիզբ դնել նման ժողովրդավարական պրակտիկային»,- ասել է Վաշաձեն:
Նրա խոսքերով` փրայմերիզի մասնակիցների հանդիպումները կսկսվեն երկուշաբթի Քութաիսում և կտևեն մեկ ամիս: Ընտրություններին առաջադրվող թեկնածուի անունը կհայտարարվի հուլիսի 30-ին: Զուգահեռաբար քվեարկություն կանցկացվի նաև առցանց տարբերակով:
Հիշեցնենք, որ Վրաստանում նախագահական ընտրությունները տեղի են ունենալու հոկտեմբերին:
