Արգենտինայում նախկին ոստիկանը դանակով ու ատրճանակով ներխուժել է կառավարության «Կասա ռոսադա» (Վարդագույն տուն) պալատը: Այս մասին հայտնում է ITAR-TASS-ը:
Ներկայանալով որպես ոստիկանության կոմիսարի տեղակալ՝ նա կարողացել է խաբել նախագահի անվտանգության ծառայությանը երկու հսկիչ-անցակետերում՝ փաստաթղթեր չունենալով: Շենք մտնելիս նա ասել է, որ եկել է իբր նոր նշանակում ստանալու: Ձերբակալման ժամանակ նա դիմակայություն չի ցուցաբերել և ինքնակամ հանձնել է զենքը:
Կառավարական նստավայրի տարածք ներխուժելու դրդապատճառները հայտնի չեն: Բուժզննմամբ պարզվել է, որ նրա մոտ առկա են հոգեբանական շեղումներ: Ամենայն հավանականությամբ, նա հաշիվ չի տվել իր գործողությունների համար:
Նա դաշնային ոստիկանությունում է ծառայել 1991-1995 թվականներին: Հայտնի չէ, թե նա ինչ պատճառով է հեռացվել ծառայությունից: 2012-ին դիմել է՝ ծառայությունը վերականգնելու խնդրանքով: Նրան պաշտոնական պատասխան այդպես էլ չեն տվել, սակայն բանավոր ասել են, որ նա կարող է աշխատանքի համար դիմել ոստիկանության ցանկացած բաժանմունք:
