Ադրբեջանական Turan լրատվական գործակալության փոխանցմամբ` Ադրբեջանի պետական նավթային ընկերությունը (SOCAR) նավթի ցածր գների ֆոնին որոշել է սահմանափակել իր գործունեությունն ԱՄՆ-ում: Այդ մասին հայտնում է լրատվամիջոցի վաշինգտոնյան թղթակիցը:
Հաղորդվում է, որ SOCAR-ը երկար ժամանակ «աջ ու ձախ» վիթխարի ծախսեր կատարելուց հետո` ներառյալ լոբբիստական նախագծերը, միջազգային մրցաշարերի հովանավորումը, փակել է իր գրասենյակները Գերմանիայում, Բելգիայում ու Շվեյցարիայում:
SOCAR-ի ամերիկյան ներկայացուցչության կայքը վաղուց չի թարմացվում, նրա աշխատակիցները չեն երևում արդեն մի քանի ամիս: Այդ շաբաթ գրասենյակի շենքի առջև անսպասելիորեն հայտնվել է «Գրասենյակը տրվում է վարձակալության» հայտարարությունը:
SOCAR-ը Dupont Circle պատմական առանձնատունը 2012 թվականին գնել է 12 միլիոն դոլարով: Ավելի վաղ այնտեղ գտնվել է Freedom House իրավապաշտպան կազմակերպության գրասենյակը:
