Փոփ երաժշտության արքա Մայքլ Ջեքսոնի ավագ որդին՝ 16-ամյա Փրինս Մայքլը, չորեքշաբթի օրը դատական գործընթացում ցուցմունք է տվել: Քննվում էր Ջեքսոնի ընտանիքի հայցը երգչի վերջին համերգային շրջագայություններ կազմակերպող ընկերության՝ AEG Live-ի դեմ: Այս մասին հաղորդում է ITAR-TASS-ը:
Որդու խոսքերով՝ 2009թ.-ին՝ փորձերից մեկից հետո, հայրն իր հետ կիսվել է իր վախերի մասին՝ ասելով, որ «նրանք պատրաստվում են սպանել ինձ»: Բացի այդ, երգիչը զայրանում էր, երբ նրան զանգահարում էր ընկերության տնօրեն Ռենդի Ֆիլիպսը: «Նա երբեմն նույնիսկ լաց էր լինում»,- հավելել է երիտասարդը:
Փրինս Ջեքսոնը նաև պատմել է այն միջադեպի մասին, երբ Ջեքսոնի մահվանից առաջ՝ հունիսի 23-ին կամ 24-ին զրույցի ընթացքում Ֆիլիպսը կոպտորեն քաշել է երգչի ձեռքը:
Ընկերության ներկայացուցիչները, սակայն, հայտարարում են, որ «12-ամյա տղան չէր կարող հասկանալ՝ ինչ է իրականում տեղի ունենում»: Փաստաբանները փորձում են երեխայի վկայությունը ներկայացնել որպես երևակայություն, որը նա իրականություն է համարում:
