Լեզվաբան Դավիթ Գյուրջինյանի մեկնաբանությամբ՝ թեստային քննությունների ժամանակ հնարավոր չէ օգտվել ծածկագրերից, դրա համար դիմորդներն առնվազն հսկայական գրադարան պիտի ունենան իրենց մոտ: Այլ հարց է, թե որքանով են բարձր թեստերի որակական հատկանիշները: «Առաջին լրատվական»-ի հետ զրույցում Դ. Գյուրջինյանն ասաց, որ պետք է լինեն ոչ թե հեշտ կամ բարդ, այլ լուրջ հարցեր, որոնք կլինեն լուրջ մշակված, բայց ծրագրի շրջանակներում՝ այն, ինչ անցել է երեխան. «Ես կարծում եմ՝ հարցարանները և շտեմարանները թույլ չեն տալիս որակյալ թեստեր կազմել, դրանք պետք է ոչ թե վերանայել, այլ ամբողջությամբ փոխել»:
«Մխիթար Սեբաստացի» կրթահամալիրի տնօրեն Աշոտ Բլեյանի մեկնաբանությամբ՝ «քննական գործընթացը» սպառված և վնասակար ձևակերպում է. «Ե´վ 12-րդ դասարանի ավարտական, և´ բուհերի ընդունելության քննությունները ուսումնական կեղծիքի հաստատումն են: Ով ուզում է սովորել, թող ունենա ավարտական փաստաթուղթ, գնա ընդունվի ուր ուզում է և սովորի, հատկապես, որ սովորողների 90 տոկոսը վճարում է»:
Ա. Բլեյանն առաջարկում է հավասար պայմաններ ստեղծել ծառայելու ենթակա երիտասարդների համար. «Անվճար ընդունվողների 10 տոկոս կա՝ զինվորական ծառայությունից ազատված: Ես ասում եմ՝ ովքե՞ր են այդ ընդունվողները, նրանք, ովքեր ընդունվում են՝ բանակ չգնալու համար: Երբ դա կհանվի, և 12-րդ դասարանից հետո հնարավորություն կունենան բոլորը՝ և´ պաշտոնյայի, և´ բանվորի երեխան միասին գնալ ծառայության, միասնական քննությունները արդար կլինեն»:
Ինչ վերաբերում է այս տարվա միասնական քննություններին, ապա կրթահամալիրի 2012-2013 թվականների գնահատման ծառայության կենտրոնի ղեկավար Լուսինե Ալեքսանյանն ասաց, որ իրենք ամեն կերպ վերահսկել են, որ արտագրություն չլինի, և քննության կարգը պահպանված է եղել: Այս կարծիքը մեզ հետ չկիսեց ավագանու «Բարև Երևան» խմբակցության ղեկավար Անահիտ Բախշյանը: Նա մեզ տեղեկացրեց, որ ծնողներն իրեն բողոքել են, թե մի շարք քննասենյակների ներսում միմյանց խանգարել են, և երեխաների բողոքը չեն լսել: Դպրոցներում տարբեր տեղեր եղել են և´ արտագրություններ, և´ ուսուցիչների կողմից հուշումներ. «Նույնիսկ լսել եմ, որ ծնողները մի քանի հոգով հավաքվել և գնել են պատասխանները, բայց թե որտեղի՞ց են գնում՝ չեմ կարող ասել»:
Նշենք, որ նախարար Արմեն Աշոտյանն այսօր հայտարարեց, որ ընդունելության նման խաղաղ քննություններ անցկացվել են մեկ էլ անցյալ տարի:
Նշենք նաև, որ առաջին փուլի արդյունքները պարզ կլինեն արդեն հուլիսի 15-ին:
Լուսանկարը՝ Photolure-ի
