Կիրակի գիշերը միաժամանակ բողոքի ակցիաներ են տեղի ունեցել թուրքական 81 նահանգներում, այդ թվում ՝ Անկարայում, Ադանայում, Ստամբուլում, Իզմիրում, Դիարբեքիրում և այլուր:
Ընդդիմադիր մամուլի տվյալներով՝ երկրի իշխող «Արդարություն» կուսակցության հրաժարականի պահանջով փողոց են դուրս եկել ավելի քան երեք միլիոն մարդ: Մարդկանց հավաքատեղիներ են դարձել տեղական զբոսայգիները: Ցուցարարներից շատերը փողոց են դուրս եկել մեխակներով, որը Թուրքական Հանրապետության հիմնադիր Քեմալ Աթաթուրքի սիրած ծաղիկն էր: Շատ վերլուծաբաններ մեխակը համարում են տեղի ունեցող իրադարձությունների խորհրդանիշ՝ «մեխակների հեղափոխություն»: Ընդդիմությունը հայտարարում է, որ իշխանությունները կորցրել են իրենց օրինականությունը և ժողովրդի վստահությունը:
Ստամբուլի Թաքսիմ հրապարակում շաբաթ օրը հավաքված հազարավոր ցուցարարների ոստիկանությունը ցրել է ջրցանների և արցունքաբեր գազի միջոցով, որոշ տվյալների համաձայն՝ կիրառվել է նաև արգելված քիմիական դեղամիջոց, որի արդյունքում տասնյակ մարդիկ թունավորվել են, կան ձերբակալվածներ:
Իր հերթին վարչապետ Ռեջեփ Թայիփ Էրդողանը հավաքում է իր կողմնակիցներին: Էրդողանը հայտարարել է, որ անկարգությունների պատճառով զգալիորեն տուժել է երկրի տնտեսությունը: Նրա խոսքերով՝ գործում է ֆինանսական լոբբի, որը հովանավորում է այս ակցիաները՝ Թուրքիայի տնտեսությունը ոչնչացնելու համար:
Էրդողանը հերքել է ժողովրդավարության ճնշման մեղադրանքները՝ հայտարարելով, որ մարդիկ ուտելիք և ըմպելիք ունեն ու բավականին ազատ են:
Վերջին տվյալների համաձայն՝ բախումների զոհ է դարձել 5 մարդ, տուժածների թիվը հասել է 5 հազարի:
