Սիդնեյի տնտեսագիտության և խաղաղության ինստիտուտի հրապարակած խաղաղասեր երկրների գլոբալ ինդեքսում Իսլանդիան զբաղեցրել է առաջին տեղը, հայտնում է Interfax-ը: Իսլանդիային հետևում են Դանիան, Ավստրիան, Նոր Զելանդիան և Պորտուգալիան:
Խաղաղասիրության տեսակետից ամենաանբարենպաստ երկիրը ճանաչվել է Սիրիան:
162 երկրներից Հայաստանը զբաղեցրել է 110-րդ տեղը, իսկ Ռուսաստանը՝ 151-րդը:
Հետազոտությունում նշվում է, որ բացարձակ խաղաղության իրավիճակում ներկայումս ապրում են միայն տասը երկրներ` Բոտսվանան, Վիետնամը, Քաթարը, Կոստա Ռիկան, Մավրիկիոսը, Պանաման, Ուրուգվայը, Չիլին, Շվեյցարիան և Ճապոնիան: Դա նշանակում է, որ այդ երկրները ընդհանրապես ներգրավված չեն որևէ ներքին կամ արտաքին հակամարտության մեջ:
Հետազոտության հեղինակները նշում են, որ անցած տարվա համեմատությամբ աշխարհը դարձել է ավելի վտանգավոր: Հիմնական խնդիրները նրանք անվանել են միգրացիոն ճգնաժամը և ահաբեկչություններից մարդկանց զոհվելը:
