Գնալով ավելի շատ եվրոպացիներ են բացասական վերաբերմունք արտահայտում ԵՄ-ի նկատմամբ՝ կապված միգրացիոն և տնտեսական ճգնաժամի հետ: Այս մասին հայտնում է RIA Novosti-ն՝ հղում անելով հասարակական կարծիքի ուսումնասիրման ամերիկյան Pew Research Center կենտրոնի սոցիոլոգիական հետազոտության արդյունքներին:
Ուսումնասիրությունը ցույց է տվել, որ հարցվածների միայն 51%-ն է լավ վերաբերվում ինստիտուտին, մինչդեռ 47%-ը հոռետեսորեն է տրամադրված ԵՄ-ի նկատմամբ: Հարցվածների միջինը 42%-ը կարծում է, որ իրենց երկրները պետք է ավելի մեծ իշխանություն ունենան:
Հարցման արդյունքներով՝ եվրոպական ինստիտուտի հիմնական կողմնակիցների մեջ են Լեհաստանի քաղաքացիների 72%-ը, Բուլղարիայի քաղաքացիների 61%-ը: Միայն հույների 27%-ը, ֆրանսիացիների 38%-ը և իսպանացիների 47%-ն է դրական արտահայտվել ԵՄ-ի վերաբերյալ: Բրիտանացիների 44%-ը, շոտլանդացիների 53%-ը ԵՄ-ն համարում է «լավ երևույթ»:
Կենտրոնը նշում է, որ դժգոհության հնարավոր պատճառների թվում կարող են լինել միգրացիոն ճգնաժամը և տնտեսական խնդիրները: Հարցվածների մեծ մասը կարծում է, որ Բրյուսելը չի հաղթահարում Եվրոպայում ներգաղթյալների խնդիրը: Շատ հարցվածներ նաև դժգոհ են տնտեսական ճգնաժամի հետ կապված ԵՄ գործողություններից:
Չնայած ԵՄ-ի նկատմամբ հոռետեսական տրամադրություններին՝ հարցվածների 70%-ը կարծում է, որ Մեծ Բրիտանիայի դուրս գալը միությունից բացասաբար կազդի եվրոպական ինստիտուտի վրա:
2016թ. ապրիլի 4-ից մայիսի 12-ն անցկացված հարցմանը մասնակցել է ԵՄ 10 անդամ երկրների մոտ 10.500 քաղաքացի:
