Գերմանական Frankfurter Allgemeine Zeitung թերթում հրապարակվել է Թուրքիայի նախագահի մամլո քարտուղար Իբրահիմ Քալընի «Հայաստանի մասին որոշում՝ ապօրինի, սխալ ու վնասակար» հոդվածը, որում նա անդրադարձել է Բունդեսթագի կողմից Հայոց ցեղասպանությունը ճանաչող բանաձևի ընդունմանը:
«Բունդեսթագի բանաձևն ունի վառ արտահայտված քաղաքական ենթատեքստ, և ըստ էության՝ լուրջ հարված է հասցրել հայերի ու թուրքերի հաշտեցման գործընթացին»,- նշված է հոդվածում:
Հիշեցնելով 2007 թվականին Հայաստանի ու Թուրքիայի միջև սկսված երկխոսության մասին՝ Քալընը նշել է. «Երկխոսության մեկնարկից երկու տարի անց կողմերը կոնսենսուսի եկան երկու արձանագրության շուրջ:
Թուրքիան անմիջապես փաստաթղթերը ընդգրկեց խորհրդարանի օրակարգում: Դժբախտաբար, Երևանը չի ձգտում քայլ կատարել դեպի առաջ: Ռեջեփ Թայիփ Էրդողանը Թուրքիայի առաջին նախագահն է, ով ցավակցություն է հայտնել Օսմանյան կայսրությունում ապրած հայերի սերունդներին:
2015 և 2016 թվականներին նախագահ Էրդողանը հանդես է եկել համանման հայտարարություններով, սակայն դրանք անտեսվել են Հայաստանի կողմից: Հանդես գալով Երևանի ու Անկարայի հաշտեցմանը նպաստելու ցանկության մասին պնդումներով՝ Բունդեսթագը իրականում չնկատեց Հայաստանի ղեկավարության անզիջում պահվածքը և այդպիսով Թուրքիայի հանդեպ որդեգրեց չափազանց անարդար դիրքորոշում:
Գերմանիայի նման դիրքորոշումը միայն խորացնում է Կովկասում տիրող իրավիճակը և դրա հետ մեկտեղ հարվածում է Բեռլինի ու Անկարայի հարաբերություններին: Որոշումը լուրջ վնաս է պատճառել գերմանական կառավարության ու թուրքական համայնքի հարաբերություններին: Գերմանիայի խորհրդարանը ևս մեկ անգամ ապացուցեց, որ պատմության քաղաքականացումը միայն վնաս է պատճառում»:
