Ավելի վաղ տեղեկացրել էինք, որ երեկ Միքայելյանի անվան վիրաբուժական հիվանդանոցում մահացել է 28-ամյա Մերուժան Ավետիսյանը. նա Գեղարքունիքի մարզի Նորակերտ գյուղի բնակիչ էր: Մերուժանը ծնոտի պլաստիկ վիրահատման նպատակով տեղափոխվել էր Միքայելյանի անվան վիրաբուժական կենտրոն, վիրահատությունը նորմալ է անցել, սակայն երկու օր անց նա մահացել է:
Հարազատները տղայի մահվան մեջ մեղադրում են բժիշկներին՝ նշելով, որ Մ. Ավետիսյանը երբեք «բժիշկների դռները չի ընկել, եղել է առողջ և մինչ վիրահատությունն էլ իրեն լավ է զգացել»:
«Առաջին լրատվական»-ը հիվանդանոցի փոխտնօրեն Օնիկ Նիկիտիչից խնդրեց մեկնաբանել երիտասարդի վաղաժամ մահվան պատճառները: Վերջինս նշեց, որ մինչ վիրահատությունը երիտասարդը բուժզննում է անցել և միանգամայն պատրաստ է եղել վիրահատության, որևէ խնդիր չի եղել: Նրա խոսքով՝ նա մահացել է վիրահատությունից երկու օր անց, իսկ պատճառն առայժմ անհայտ է. «Վիրահատությունն անցել է բարձր մակարդակով, ընթացքում որևէ խնդիր չի առաջացել, նրա մահվան պատճառը մեզ համար էլ է անհայտ՝ նա հանկարծամահ է եղել, դատաբժշկական փորձաքննությունը ցույց կտա»:
Մենք հետաքրքրվեցինք՝ արդյոք եղե՞լ է առողջական վիճակի վատթարացում, գուցե ջերմությունն է հանկարծակի բարձրացել և հնարավոր չի եղել իջեցնել, մեր զրուցակիցն ասաց. «Ոչ մի ջերմություն, ոչ մի խնդիր, երիտասարդը պարզապես հանկարծամահ է եղել»։
Նա նաև նշեց, որ այդօրինակ վիրահատություններ իրենց հիվանդանոցում բազմիցս են արվել, և երբևիցե որևէ խնդիր չի առաջացել. «Լինում են, այո՛, իհարկե, վիրահատություններ, որոնցից հետո բարդություններ են առաջանում, բայց այս դեպքում ամեն ինչ նորմալ է եղել: Այլ պարզաբանում չեմ կարող տալ, որովհետև ինքս էլ չգիտեմ՝ մինչև դատաբժշկական փորձաքննությունը չավարտվի, իմանալ չենք կարող»:
Մեր հարցին՝ ինչպե՞ս են վերաբերվում այն հանգամանքին, որ երիտասարդի հարազատները հենց բժիշկներին են մեղադրում երիտասարդի մահվան մեջ, Օնիկ Նիկիտիչը պատասխանեց. «Դե, դա բնական է, բժիշկներն են վիրահատել. նրանց վիշտն էլ է հասկանալի»:
