«Փառապանծ մարտիկներ» ՀԿ-ի նախագահ Գրիշա Սարգսյանի մեկնաբանությամբ` օրերս ԱԺ-ում ընդունված երկրապահ կամավորականների մասին օրենքը չի բխում ազատամարտիկների շահերից. «Այս օրենքը միայն ԵԿՄ-ի ներկայացուցիչների համար է գործելու: Կոչ եմ անում նախագահին, ԱԺ բոլոր պատգամավորներին երրորդ ընթերցման մեջ այս օրենքում կատարել լրացում` «երկրապահ կամավորական»-ը փոխել «ազատամարտիկ» բառի»:
Այսօր հրավիրված ասուլիսում Գրիշա Սարգսյանը համոզմունք հայտնեց, որ «երկրապահ» և «ազատամարտիկ» բառերն իրարից շատ տարբեր են: Հայ մարտիկները պաշտպանել են անգամ Աֆղանստանի սահմանները, դա նշանակում է, որ երկիր են պահել, երկրապահ են, ոչ թե հայրենիքի համար կռված ազատամարտիկ։ «Պատերազմի մասնակիցն ի՞նչ կապ ունի երկիր պահողի հետ, դա պետք է փոխել «ազատամարտիկ» անունով»,- նորից շեշտեց նա:
Բանախոսն ասաց, որ ինքը դեռևս 2006 թվականին օրենքի փաթեթ է ներկայացրել ԱԺ` ազատամարտիկների խնդիրները օրենքով կարգավորելու համար: Այդ նածագիծը ոչ մի արձագանք չի գտել, իսկ երկու-երեք օրում քննարկված նախագիծն ընդունում են. «Շըփ-թըփ՝ երկու օրում օրենք չեն հաստատում, նման բան չի կարելի: Դա ընդամենը ազատամարտիկների 20 տոկոսի շահերից է բխում, իսկ մնացած ութսունի համար ոչինչ այդպես էլ չի արվի: Նպատակը երկրապահի մասին օրենք ընդունելն էր: Ապրի գեներալը, որ դաբիցա եղավ, իրա թիմին օրենքով սահմանված կարգ տվեց»:
Լուսանկարը՝ Photolure-ի
