Հնգամյա դադարից հետո Իսրայելն ու Վրաստանը որոշել են վերսկսել համագործակցությունը, որն ընդհատվել էր 2008-ի ռուս-վրացական պատերազմից հետո: Վրաստանը հետաքրքրված է իսրայելական անօդաչու թռչող սարքերի և հակատանկային հրթիռների ձեռք բերմամբ: Այս մասին հայտնում է իսրայելական «Կուրսոր» գործակալությունը՝ հղում անելով «Մաարիվ» թերթին:
Հաջորդ շաբաթ Իսրայել կայցելի Վրաստանի վարչապետ Բիձինա Իվանիշվիլին: Այցի շրջանակներում նա մտադիր է այցելել ռազմական արդյունաբերության գործարաններ: Նա նաև կհանդիպի Իսրայելի վարչապետ Բենիամին Նեթանյահուի և նախագահ Շիմոն Պերեսի հետ:
Ինչպես նշում է թերթը՝ բացառված չէ, որ այցը կհետաձգվի Իսրայելի ԱԳՆ-ի ծառայողների գործադուլի պատճառով:
Ցանկացած դեպքում Վրաստանի վարչապետի այցից հետո Իսրայել կայցելի երկրի պաշտպանության նախարար Իրակլի Ալասանիայի գլխավորած զինվորական պատվիրակությունը:
«Մենք Ռուսաստանի հետ արդեն պատերազմական վիճակում չենք, և հնարավորություն կա՝ խթանելու համագործակցությունը Իսրայելի հետ պաշտպանական ոլորտում»,- այդ առնչությամբ հայտարարել է Վրաստանի պաշտպանության նախարարը:
