Ողջ աշխարհում արյան դոնորությունը համարվում է բարեգործություն: Առողջապահության նախարարության գլխավոր արյունաբան Սմբատ Դաղբաշյանի խոսքով` մեր երկրում արյան կարիք միշտ կա: Նա այսօր լրագրողների հետ հանդիպմանը ասաց, որ հիվանդանոցներում օրական տարբեր վիրահատություններ են կատարվում, և ամեն րոպե կարող է զգացվել արյան կարիք:
Նա նշեց, որ մեզանում ամենաքիչ հանդիպող արյան կարգը չորրորդ բացասականն ու երրորդ բացասականն է:
Հայաստանում այժմ կա 14 հազար դոնոր՝ բնակչության 4-5 տոկոսը, սակայն ելնելով ազգաբնակչության քանակից՝ այդ թիվը պետք է լիներ 60 հազար. «Մեր արյան ցուցանիշները բարվոք են, առողջ դոնորներ ունենք, սակայն անհրաժեշտ է քարոզել, որպեսզի դրանց թիվն ավելանա: Ուսանողների մեջ տասից հինգ-վեցին կարողանում ենք դարձնել դոնոր, մեծահասակների շրջանում` չորս կամ հինգ մարդու»:
Ասուլիսի մյուս բանախոս, The Laboraory ընկերության նախագահ DJ Վակցինան էլ նշեց, որ իրենք հիմնականում արյունատվության ակցիաներ են կազմակերպել՝ «Դարձիր դոնոր, նվիրիր արյուն» խորագրով: Վաղը ևս Հյուսիսային պողոտայում սպասվում է համերգ, որին կմասնակցեն հայկական շոու-բիզնեսի գրեթե բոլոր ներկայացուցիչները. «Վաղվա միջոցառումը շատ մեծ քայլ է, իրականում նման բան չի եղել, սա առաջին անգամ է, բայց շարունակական կլինի: Մեր հիմնական նպատակն այն է, որ երիտասարդներին տեղեկացնենք, թե ինչ է դոնորությունը, և նրանք, ովքեր ցանկություն կունենան, կանդամագրվեն մեզ մոտ` դոնորության համար»:
Նշենք, որ մեզանում արյան դոնոր կարող է դառնալ 18 տարին լրացած յուրաքանչյուր մարդ, ով վեց ամիս ապրել է Հայաստանում` անկախ սեռից, մաշկի գույնից, սոցիալական պատկանելությունից, կրոնից: Տղամարդկանցից կարելի է տարեկան արյուն վերցնել 4, իսկ կանանցից` 5 անգամ` 450 մլ:
Գոյություն ունեն արյան դոնորության մշտական և ժամանակավոր բացառություններ: Ժամանակավոր բացառված է արյուն վերցնել հղիության, մաշկի և լորձաթաղանթի հետ կատարված միջամտության, ականջի բլթակի ծակելու, ասեղնաբուժության, ջերմության բարձրացման, դեղորայքների ընդունման դեպքերում: Մշտապես հակացուցվում են սրտանոթային, հոգեկան, ուռուցքային հիվանդությունների, սիֆիլիսի, ՄԻԱՎ-ի և այլ դեպքերում:
Լուսանկարը՝ PanARMENIAN Photo-ի
