ԱՄՆ-ը պետք է դառնա էներգակիրներ արտահանող երկիր։ Նման հայտարարությամբ է հանդես եկել միլիարդատեր Դոնալդ Թրամփը Բիսմարկում (Հյուսիսային Դակոտա) լրագրողների հետ հանդիպմանը՝ փոխանցում է TASS գործակալությունը։
«Մենք էներգիայի անհավանական պաշարներ ունենք»,- ասել է Թրամփը, ով անհրաժեշտ թվով պատվիրակների աջակցություն է ստացել Հանրապետական կուսակցությունից ԱՄՆ նախագահի պաշտոնում թեկնածու առաջադրվելու համար։ «Պետք է մենք էներգակիրներ վաճառենք այլ երկրների, քանի որ մենք բառացիորեն նստած ենք էներգակիրների վիթխարի պաշարների վրա»։
Լրագրողների հետ հանդիպմանն անդրադառնալով կանադական Ալբերտա նահանգից Տեխասում Մեքսիկական ծոցի ափ Keystone XL նավթատարի անցկացմանը՝ Թրամփը հայտարարել է, որ կաջակցի այդ նախագծին, որը նախկինում մերժվել էր Օբամայի վարչակազմի կողմից, սակայն պայմանով, եթե ԱՄՆ-ը որոշակի եկամտային մաս ստանա նավթատարի շահագործումից։
Ամերիկյան նավթի արտահանման արգելքը սահմանվել էր 40 տարի առաջ՝ ի պատասխան արաբական պետությունների կողմից 1973 թվականին Արևմուտքի երկրներ նավթի մատակարարումների էմբարգոյի հայտարարման։
