Սիրիայի մայրաքաղաաք Դամասկոսի արևելքում՝ Սինաա արդյունաբերական շրջանում, այսօր ռումբ է պայթել: «Ալ-Մայադին» հեռուստաալիքի փոխանցմամբ՝ տուժել է երեք խաղաղ բնակիչ, որոնք հիվանդանոց են տեղափոխվել:
Սա երկրորդ ահաբեկչությունն է Դամասկոսում՝ վերջին 48 ժամվա ընթացքում: SANA պետական սիրիական գործակալությունն ավելի վաղ հաղորդել է Աշմար հրապարակում ռումբի պայթյունի մասին, որտեղ նույնպես վիրավորվել էին մի քանի խաղաղ բնակիչ:
Այսօր առավոտից Սիրիայի կառավարական զորքերը սկսել են մաքրել Ալ-Ասալի թաղամասը՝ Դամասկոսի հարավում, որտեղ ներխուժել էին գրոհայինները:
«Ալ-Վատան» լրատվական ծառայությունը նշում է, որ դիմադրության օջախներ են ոչնչացվել Թադամուն և Կադամ հարավային արվարձաններում: Փոխհրաձգությունները շարունակվում են պաղեստինցի փախստականների Յարմուկ ճամբարում:
Դամասկոսի հյուսիսում՝ Ռուքն Ալ-Դին թաղամասում, անվտանգության ուժերը հայտնաբերել են պահեստ, առգրավել են նռնականետեր, զինամթերք: Բասատին-Բերզիում ոչնչացվել է 15 ահաբեկիչ:
