Հոլիվուդյան աստղերը կոչ են արել ԱՄՆ նախագահ Բարաք Օբամային ազատել աշխարհը միջուկային զենքից: «Ազգային անվտանգության ոլորտի փորձագետների և ողջ աշխարհի մարդկանց ուղերձն ակնհայտ է՝ միջուկային զենքի ոչնչացումն աշխարհը միջուկային սպառնալիքից ազատելու միակ միջոցն է»,- հայտարարել է տեսաուղերձի հեղինակներից մեկը՝ Մայքլ Դուգլասը: «Ժամանակն է աշխարհը վերադարձնել միջուկային զրոյականի»,- ընդգծել է ամերիկացի հայտնի դերասանը:
Հոլովակում նկարահանվել են նաև Ռոբերտ Դե Նիրոն, Մորգան Ֆրիմանը, Մեթ Դեյմոնը, Ալեք Բոլդուինը, Դեննի դե Վիտոն, Վուպի Գոլդբերգը, Մարտին Շինը, Նաոմի Ուոթսը, Ջոն Կյուսակը: Տեսաուղերձի հեղինակները հիշեցնում են, որ դեռևս 2009 թվականին Պրահայում Օբաման հայտարարել է միջուկային զենքից լիովին ազատ աշխարհի կառուցման հասնելու ձգտման մասին: Այս մասին հայտնում է Interfax-ը:
Տեսաուղերձը թողարկվել էր «Մեծ ութնյակի» գագաթնաժողովի և դրա ընթացքում Օբամայի ու Վլադիմիր Պուտինի հանդիպման նախաշեմին:
