«Երևանը տեղական ինքնակառավարվող մարմին է, քաղաքապետը ժողովրդի քվեի արդյունքում է ստացել մանդատ». քիչ առաջ ՀՀ Ազգային ժողովի արտահերթ նստաշրջանի առաջին նիստում հայտարարեց ՀՀ փոխվարչապետ Արմեն Գևորգյանը՝ ի պատասխան «Ժառանգություն» խմբակցության պատգամավոր Զարուհի Փոստանջյանի հարցի: Նա հարց էր ուղղել փոխվարչապետին Երևանի քաղաքապետ Տարոն Մարգարյանի իրականացրած չարաշահումների մասին՝ հղում անելով հողային աճուրդներին, որոնք ընթացել են փակ, շեղումներով, և տեղի են ունեցել օրենքից դուրս աճուրդներ:
Փոստանջյանի համոզմամբ՝ Երևանի քաղաքապետը չարաշահել է իր պաշտոնեական դիրքը: «Այս քաղաքապետը ամեն շաբաթ մասնակցում է ՀՀ կառավարության նիստերին ու քննարկումներին, Դուք իր հետ արդյունավետ հողի կառավարման և պետությանը հասցված վնասի մասին խոսե՞լ եք: Նա ձեռք է բերել լիազորություններ, որոնք օրենքով իրեն սահմանված չեն: Ինչո՞ւ չեք ձեռնարկում միջոցներ՝ նրան պատասխանատվության ենթարկելու: Սերժ Սարգսյանը տեղյալ է՝ չի ձեռնարկում, ՎՊ-ն տեղյակ է՝ չի ձեռնարկում, ես բոլոր քաղաքական ուժերին հորդորելու եմ հետևողական լինել: Ո՞րն է լինելու սրա հետևանքը»,- ասաց Զարուհի Փոստանջյանը:
Ի պատասխան՝ Արմեն Գևորգյանը նշեց, որ չի կարող ասել, թե ինչու ՎՊ-ն չի դիմել: «Ես կարծում եմ, որ հողային պաշարների հետ կապված խնդիրներ ունենք, օրենքով կարգավորումներ պետք է ունենանք, որ համայնքներն ամեն մեկն իր հայեցողությամբ այդ հարցերը չլուծի: Եկեք հաշվի առնենք, որ Երևանը տեղական ինքնակառավարվող մարմին է, քաղաքապետն ընտրվել է, ստացել է բնակչության մանդատը: Նմանատիպ առաջարկություններով հանդես գալու համար կառավարությունը պետք է ունենա բավարար հիմքեր, որովհետև առնվազն այն, ինչ ասացիք, կարող է կրկնակի մեկնաբանության տեղիք տալ»,- պարզաբանեց փոխվարչապետը:
Արձագանքելով փոխվարչապետի պատասխանին՝ Փոստանջյանը փորձեց այլ օրենքի պահանջ ընթերցել, որը կպնդի, որ քաղաքապետը քրեորեն պատժելի արարքներ է իրականացրել և իր լիազորություններից անցել:
«Զավեշտն այն է, որ պաշտոնեական դիրքի չարաշահման օբյեկտ կամ սուբյեկտ է Երևանի ավագանին, ավագանին է այդպիսի որոշում կայացրել, որպեսզի նրան վերապահված լինի այդ իրավունքը: Դուք կարող եք Ձեր նախաձեռնությամբ դիմել իրավապահ մարմիններին, քանի որ ավագանին է այդ որոշումը կայացրել: Երևանի ավագանուն պետք է պատասխանատվության ենթարկել: Եթե «Բարև» դաշինքը ավագանու կազմում է, կառաջարկեի, որ առաջիկայում այս հարցը դարձնեն քննարկման առարկա»,- ասաց Արմեն Գևորգյանը:
