ՀՀ վարչապետ Տիգրան Սարգսյանը, ելույթ ունենալով Բաց կառավարման գործընկերություն-Հայաստան առաջին միջազգային համաժողովի բացմանը, նշեց, որ մեր առջև կանգնած կարևորագույն և սկզբունքային խնդիրների լուծումը պարտավոր ենք միասին գտնել, կառավարության յուրաքանչյուր ծրագիր կարող է հաջողություն ունենալ, եթե այն ներկայացվում է հասարակությանը, դառնում քննարկման և քննադատության առարկա, որից հետո նոր ընդունվում: Սա, ըստ նրա, քաղաքացիական հասարակության կառուցման ճանապարհն է:
Նրա խոսքերով` անցումային հասարակություններում դեպի քաղաքացիական ինստիտուտներ անցումը ցավոտ ճանապարհ է, քանի որ յուրաքանչյուր անդամ պետք է փոխի իր վարքագծային կանոնները:
«Ակնհայտ է, որ չի կարող ձևավորվել քաղաքացիական հասարակություն, եթե կառավարության գործունեությունը չլինի բաց և թափանցիկ»,- ասաց վարչապետը:
Նա ներկայացրեց երկու կարևորագույն պատճառ, թե ինչու պետք է իշխանության գործունեությունը լինի բաց և թափանցիկ. իշխանությունը պարտադրանքի մոնոպոլիա է, եթե իշխանությունը կիրառում է այդ պարտադրանքի գործիքը, հասարակությունը պետք է վստահ լինի, որ այն իր չարս չի գործադրվում, և եթե հասարակության մոտ դրա նկատմամբ վստահություն չլինի, այդ հասարակությունը չի կարող ապահովել զարգացում: Դա է պատճառն, ըստ վարչապետի, որ իշխանությունների կողմից ցանկացած գործողություն հասարակության կողմից պետք է դրվի կասկածի տակ:
«Շատ հաճախ նկատում եմ, որ իշխանության լծակներ ունեցող մարդիկ դժգոհում են հասարակության այդ վերաբերմունքից, բայց դա քաղաքացիական հասարակության կայացման կարևոր բաղադրիչ է»,- հավելեց Տ. Սարգսյանը:
Երկրորդ կարևորագույն հանգամանքը, նրա դիտարկմամբ, նոր իշխանական լծակների, ֆինանսական ռեսուրսների վերաբաշխումը, տնօրինումը նույնպես արդարդացի է: Սա ենթադում է, որ հասարակության հսկողության տակ պետք է գտնվի, և հասարակությունն իրավունք ունի կասկածելու սա ի շահ իրե՞ն է, թե՞ ի շահ մի քանի անձի է:
«Մեր աշխատաոճը բաց է և թափանցիկ»,- ասաց վարչապետը` հավելելով, որ քաղաքացիական հասարակության կառուցման այլընտրանք գոյություն չունի:
Նա նշեց, թե ինչպես են ապահովելու թափանցիկություն բոլոր մակարդակներում. «Դու պետք է թափացնիկ և հաշվետու լինես հասարակության առջև, հասարակությունը քո բոլոր գործերը պետք է տեսնի: Սա քաղաքացիական հասարակության կառուցման ֆունդամենտալ խնդիրներից մեկն է»:
Բացի թափանցիկությունից, վարչապետի դիտարկմամբ, կարևոր է հասարակության ներգրավվածությունը որոշումների կայացման գործընթացին։ Հասարակությունը պետք է վստահ լինի, որ իր կարծիքն ազդում է իշխանության կողմից որոշումների կայացման վրա:
«Եթե մենք ապահովում ենք այս առաջին երկուսի իրականացումը Հայաստանում, հարց է առաջանում, որ մենք միևնույն ժամանակ պարտավոր ենք ապահովել պատասխանատվությունը և պրոֆեսիոնալիզմը, ինչը մեզանում հաճախ բացակայում է և հանգեցնում լրջագույն խնդիրների: Տեղեկատվությունը, որը մատուցվում է, պետք է հասարակությունը զանազանի ճիշտը ստից»,- նշեց նա:
Այստեղ, ըստ վարչապետի, մենք ունենք խնդիրներ, քանի որ շատ հաճախ պատրաստ չենք պատասխանատու ձևով աշխատել այս գործիքների հետ, ինչը պրոֆեսիոնալիզմի բացակայությամբ է պայմանավորված:
Նա նշեց, որ հանրությունը հեշտ ընկալում է սենսացիոն լուրերը, ԶԼՄ-ները չեն զտում այդ տեղեկատվությունը, և դրանք նեգատիվ տրամադրություններ են ստեղծում:
Արդյունքում, վարչապետի դիտարկմամբ, մամուլը բացասական տեղեկատվությամբ է հեղեղված, ինչը ստեղծում է ապագայի նկատմամբ անվստահություն և մշտական դժգոհություն, որը հնարավորություն չի տալիս ռեսֆորմները տանել առաջ:
Պատասխանատվության և պրոֆեսիոնալիզմի սկզբունքը, ըստ նրա, բացակայում է, սա ցույց է տալիս որ, մենք այստեղ անելիքներ ունենք:
«ՀՀ կառավարությունն իր թափանցիկությամբ աշխարհի հինգ պետությունների մեջ է մտնում, որն ամբողջությամբ բյուջերի ծախսերը դարձրել է թափանցիկ, ընդ որում` բոլոր մանրամասնություններով»,- ասաց վարչապետը:
Լուսանկարը՝ Armenpress-ի
