Ազգային ժողովում շարունակվում են 2012թ. կառավարության գործունեության վերաբերյալ ՎՊ նախագահ Իշխան Զաքարյանի ներկայացրած հաշվետվության քննարկումները:
ԱԺ ՀԱԿ խմբակցության ներկայացուցիչ Լևոն Զուրաբյանն ասաց, որ ողջունում է Իշխան Զաքարյանին, որ վեցամյա աշխատանքի շնորհիվ հասել են մի արդյունքի, որը կարելի է հրաշք անվանել, քանի որ Հովիկ Աբրահամյանը որդեգրեց այն բառապաշարը, որը երկար տարիներ ՀԱԿ-ն է օգտագործում. նա ասաց՝ թալանչիներ և գողեր:
Լևոն Զուրաբյանը հետաքրքիր համարեց այն հանգամանքը, որ ՀՀԿ հռետորները անցել են քննադատության. «Բոլորն ուզում են այդ չաղ ու բախտավոր գողին գտնել, բայց ոչ ոք չի ցանկանում գտնել և չգիտի՝ ինչ անել, բայց պետք է դնել քաղաքական պատասխանատվության հարցը»: Նա հարց ուղղեց, թե որտե՞ղ էին ՀՀ նախագահը, ՀՀ վարչապետը:
««Հյուսիս- Հարավ» ճանապարհային ծրագրի համար որքա՞ն միջոց է օգտագործվել: Արդյոք այնքան աղաղակող խախտումներ կա՞ն, որ ուզում եք նոր տենդեր անցկացվի: Չե՞ք գտնում, որ այդ ծրագրի իրականացման կառավարման խորհրդի նախագահը՝ ՀՀ վարչապետը, իրավական և քաղաքական պատասխանատվություն է կրում այս չարաշահումների համար»,- հարց ուղղեց Լևոն Զուրաբյանը:
Ի պատասխան՝ Իշխան Զաքարյանն ասաց, որ չի կարող ասել՝ այդ գումարը որքան է կազմում, իսկ ինչ խնդիր դրվել է, կառավարությունն արել է:
Լևոն Զուրաբյանը մեկ անգամ ևս կրկնեց հարցը՝ կառավարման խորհուրդը և նախագահ Տիգրան Սարգսյանը պատասխանատվություն կրո՞ւմ են չարաշահումների համար:
Իշխան Զաքարյանի խոսքով՝ ՀՀ վարչապետը տվել է հանձնարարական՝ բանակցել և հասկանալ, թե որն է պատճառը, եթե չշտկվի, հանձնարարական կա, համաձայն որի՝ չվնասելով ՀՀ շահերը՝ չեղյալ համարել ու հայտարարել նոր մրցույթ:
