«Ո՞ւմ է պետք գիտական միտքը, եթե չի նպաստում երկրի առաջընթացին «Առաջին լրատվական»- ի հետ զրույցում ասաց Հովհ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը: Անդրադառնալով ԳԱԱ նախագահի օրերս արված հայտարարությանը, թե մեծ տերությունները մեզ թույլ չեն տա զենք արտադրել, Ռ. Բաբայանը նշեց. «Շատ կարևոր է, թե ով է լիդերը: Եղբա՛յր, դու արա՛, քո գործը չէ՝ թույլ կտան, թե թույլ չեն տա, քո գործը գիտական միտք զարգացնելն է, հնարավորություններ ստեղծելը և նորարարությունները տալ արտադրությանը: Թող քաղաքական գործիչներն զբաղվեն քաղաքականությամբ»:
Ռ. Բաբայանի կարծիքով, եթե գաղափարներ են նետվում հասարակությանը և հասարակությունը դա չի ընդունում, դա գալիս է ոչ թե նրանից, որ հասարակությունն է տկար, այլ նրանից, որ մեր գաղափարներն են անհետաքրքիր, հետամնաց. «Գուցե նոր գաղափարների ժամանակն է եկել, գուցե փորձենք սթափ, ընկալելի լեզվով հասկանալ, թե ինչ երկիր ենք ուզում կառուցել, ինչ քաղաքակրթական դաշտում ենք տեսնում այդ երկիրը:
Անդրադառնալով Լեռնային Ղարաբաղի անկախության ճանաչման խնդրին՝ Ռ. Բաբայանը կարևորեց, որ նախևառաջ դե ֆակտո պետք է ճանաչել. «Իսկ դա նշանակում է չխառնվել Ղարաբաղի ներքին գործերին, չբերել ԼՂ-ի նախագահին և դարձնել քո երկրի վարչապետ, դա նշանակում է չփորձել նրա փոխարեն ստանձնել բանակցային ֆունկցիաները»:
Նա նաև նշեց, որ ինքը կողմ է, որ երկու հայկական պետություններ լինեն:
Մանրամասները՝ տեսանյութում:
