Գերագույն խորհրդի պատգամավոր Սուրեն Զոլյանի համար անհասկանալի է այս օրերին հնչող այն տեսակետը, որ ընդդիմությունը պետք է համախմբվի, մանավանդ անձի կամ իշխանության շուրջ:
Իշխանությունն, ըստ Ս. Զոլյանի, առաջ չի քաշում հստակ ձևավորված մոտեցում հակամարտության կարգավորման հարցում, ընդամենը խոսակցություններ են, ընդ որում՝ իշխող քաղաքական թիմի կարծիքներն իրարամերժ են. «Առայժմ հարցը քննարկման փուլում է անգամ ՀՀԿ-ի վերնախավում, եթե մենք չգիտենք, թե ինչ է առաջարկում ՀՀԿ-ն, ինչի՞ շուրջ համախմբվենք»:
«Նախևառաջ մենք պիտի ունենանք մի մարմին, որտեղ այդ հարցերը պիտի քննարկվեին. դա նախևառաջ պիտի լիներ խորհրդարանում: Ընդդիմադիր կուսակցություն է, թե իշխանություն, պետք է ունենա իր տեսակետը, և դա պետք է լինի գործնական, ոչ թե կոչերով,- «Առաջին լրատվական»- ի հետ զրույցում ասաց Սուրեն Զոլյանը:- Այստեղ խնդիր կա. կարծես թե խուսափում են պատասխանատվությունից: Վիճակը շատ լուրջ է, և որոշումները, և լուծումները շատ ցավալի պիտի լինեն: Բայց ես տեսնում եմ միտում՝ նորից ամեն ինչը լուծել ժողովրդի հաշվին»:
Նրա խոսքով՝ այն դիրքերը, որ զորքը զիջում է, շատ երևացող է, իսկ արտաքին քաղաքականության ոլորտում անտեսվում է: Ս. Զոլյանի դիտարկմամբ՝ Ադրբեջանը բավականին լուրջ հիմքեր է նախապատրաստել, ցանկացած միջազգային ճնշման դեպքում կարող է փաստաթղթերով ամրագրված իր իրավունքն ի ցույց դնել, և դա ավելացնում է այս ամենի վտանգը:
Ս. Զոլյանի կարծիքով՝ հասարակությունն այսօր պառակտված է և չունի այն ներուժը, իշխանությունը պետք է ստանձնի պատասխանատվությունը. «Եկել է պատասխան տալու ժամանակը»:
Մանրամասները՝ տեսանյութում:
