Երեկ Պռոշյան գյուղում Կոտայքի մարզպետ Կովալենկո Շահգալդյանը համայնքապետի ժամանակավոր պաշտոնակատար է նշանակել Արմինե Մելիքյանին, ով աշխատանքային առաջին իսկ օրը հանդիպել է պռոշյանցիների դիմադրությանը: Գյուղացիները չեն ընդունում նրան, քանի որ, ինչպես «Առաջին լրտավական»-ի հետ զրույցում նշեցին պռոշյանցիները, առանց այն էլ գյուղի լարված մթնոլորտը այդ նշանակմամբ ավելի է խորանում. Արմինե Մելիքյանը արդեն մի քանի անգամ հասցրել է ձախողել Պռոշյան համայնքի դպրոցի տնօրենի ընտրությունները: Բացի այդ, ասում են, որ վերջինս Կոտայքի մարզպետի մտերիմներից է:
Կոտայքի մարզպետ Կովալենկո Շահգալդյանը, անդրադառնալով գյուղապետի պաշտոնակատարի նշանակմանը, «Առաջին լրատվական»-ի հետ զրույցում ասաց, որ օրենքի պահանջն է մարզպետի կողմից համայնքի ղեկավարի պաշտոնակատար նշանակելը. «Ես այն արել եմ իմ իրավասությունների և պարտականությունների շրջանակում»,- ասաց Կովալենկո Շահգալդյանը:
Հարցին՝ ինչո՞ւ Արմինե Մելիքյանին նշանակեցիք պաշտոնակատար, երբ պռոշյանցիները նրա հանդեպ մեծ դժգոհություն ունեն, մարզպետը պատասխանեց. «Պաշտոնակատարի ընտրությունը կատարում է մարզպետը, և ես էլ ընտրություն կատարել եմ, որևէ մեկի հետ պիտի չհամաձայնեցնեի»:
Չէ՞ որ Պռոշյան գյուղում այդքան լարված է մթնոլորտը՝ դիտարկմանը Կովալենկո Շահգալդյանը պատասխանեց, որ Պռոշյան գյուղում լարված մթնոլորտ չկա, մի քանիսն են այդ մթնոլորտը լարում:
Չե՞ք մտածում, որ պռոշյանցիների այս քայլը կարող է վարակիչ լինել նաև մարզի մյուս գյուղերի համար՝ հարցին զայրացած պոռթկաց. «Ասում եմ՝ մի՛ շարունակեք», ու անջատեց հեռախոսը:
