EuroNews հեռուստաալիքի փոխանցմամբ՝ երեկ Անկարայում անցկացվել է խորհրդարանի՝ Սահմանադրության հարցերով հանձնաժողովի հերթական նիստը, որի ժամանակ քննարկվել է մի շարք պատգամավորների անձեռնմխելիությունից զրկելու հարցը:
Այն դարձյալ ուղեկցվել է զանգվածային ծեծկռտուքով: Այս անգամ այն ծագել է այն բանից հետո, երբ արդարադատության նախարար Բեքիր Բոզդաղը քրդամետ «Ժողովուրդների դեմոկրատական» կուսակցության (ԺԴԿ) պատգամավորներին մեղադրեց նախորդ նիստերում բռնություն հրահրելու համար:
Թուրքիայում ավելի քան զգացական հարց է համարվում պատգամավորական անձեռնմխելիությունից զրկելը: ԺԴԿ-ի պատգամավորները համոզված են, որ այդ օրինագիծը կոչված է «կանաչ լույս» վառել՝ դատական հետապնդում իրականացնելու այն պատգամավորների հանդեպ, որոնց Անկարան մեղադրում է «Քրդստանի աշխատավորական» կուսակցությանը (PKK) աջակցելու համար:
Բանավեճերի լարվածության մասին վկայել է այն փաստը, որ հանձնաժողովի 26 անդամի փոխարեն նիստին մասնակցել է մոտ 100 պատգամավոր, որոնց 2/3-ը բաժին է ընկել իշխող «Արդարություն ու զարգացում» կուսակցությանը (ԱԶԿ) և 1/3-ը՝ ընդդիմությանը:
Ընդգծվում է, որ նախորդ շաբաթ հանձնաժողովի աշխատանքները երկու անգամ ընդհատվել են նույն պատճառով:
