Մայիսի 30-ից հունիսի 2-ը Իտալիայում տեղի ունեցավ պատանի երաժիշտների «Լուիջի Զանուսոլլի» միջազգային 11-րդ մրցույթը, որին մասնակցեցին նաև 8 հայ պատանի երաժիշտներ` Ալեքսանդր Սպենդիարյանի անվան երաժշտական մասնագիտական դպրոցի սաները:
Ուրախությամբ փաստում ենք, որ 100-ից ավելի մասնակիցների մեջ, երաժշտական բարձրորակ կատարմամբ հայտնի իտալական, ռուսական, ճապոնական դպրոցների ներկայացուցիչների կողքին մեր երեխաները պատվով են ներկայացել, և բոլորը հայրենիք են վերադարձել պատվավոր հորիզոնականներ նվաճած դիպլոմներով:
Այսպիսով`
Ռուբեն Հարությունյան` 2-րդ մրցանակ, դաշնամուր,
Նելլի Երվանդյան` 3-րդ մրցանակ, ջութակ,
Սպարտակ Աղաբաբյան` 2-րդ մրցանակ, ջութակ,
Նորայր Մաղաքյան` 1-ին մրցանակ, ջութակ,
Դիանա Հարությունյան` 3-րդ մրցանակ, ջութակ,
Անի Մկրտչյան` 3-րդ մրցանակ, ֆլեյտա,
Նատալի Մկրտչյան` 1-ին մրցանակ, դաշնամուր,
Մերի Սարգսյան` Գրան Պրի, դաշնամուր:
Այս երեխաներից մի քանիսն առաջին անգամն էին մասնակցում որևէ մրցույթի: «Հուզմունքն ու պատասխանատվության զգացումն աննկարագրելի մեծ էր, բայց մենք գիտեինք, թե որքան մարդիկ են աղոթում մեզ համար ու անհամբեր սպասում. դա քաջալերում էր: Մենք բոլորս էլ հենց սկզբից որոշել էինք հայրենիք վերադառնալ միայն մրցանակներով: Փառք Աստծուն, այդպես էլ եղավ, և մենք շատ ուրախ ենք նաև մեր դասատուների համար, որոնք այնքան ջանք են ներդրել մեզ լավագույնը փոխանցելու համար»,- «Առաջին լրատվականի» հետ զրույցում ասաց 12-ամյա Նելլի Երվանդյանը, ով պատրաստվում է ևս մեկ մրցույթի` այս անգամ Երևանում:
Իսկ Գրան Պրի մրցանակը շահած 11-ամյա Մերի Սարգսյանի համար Իտալիայի մրցույթն այս տարվա ընթացքում երկրորդն էր: Մինչ այս, գարնանը նա մասնակցել էր Գյումրիում կայացած «Վերածնունդ» մրցույթին, որտեղ արժանացել էր 2-րդ մրցանակին: Երեխաներին ամենից շատ տպավորել էր մրցույթի այլազգի և հայ մասնակիցների միասնականությունն ու հոգատարությունը միմյանց հանդեպ, ինչի մասին առանձնակի ոգևորությամբ պատմում էր 11-ամյա Ռուբեն Հարությունյանը, ով միջազգային մրցույթի մասնակցության փորձառություն արդեն ունի:
Ի դեպ, մի քանի օր առաջ Երևանի քաղաքապետարանի կազմակերպած Երևանի երաժշտական և արվեստի դպրոցների 6-րդ մրցույթ-փառատոնի ամփոփման արդյունքում Ալ. Սպենդիարյանի անվ. երաժշտական դպրոցը գրավել է առաջին հորիզոնականը:
