Անկարայում այսօր առավոտյան ոստիկանությունը փորձել է Կուգուլու այգուց ուժով դուրս մղել ցուցարարներին: Ակցիայի մասնակիցների և իրավապահների միջև սկսվել է կատաղի լեզվակռիվ. իրավապահները զիջել են: Այս մասին հայտնում է ITAR-TASS-ը:
Ոստիկանությունը փորձել է հեռացնել այգու վրանների մի մասը, սակայն դիմակայությունը ստիպել է նրան նահանջել: Ցուցարարները հայտարարել են, որ կգնան քաղաքապետարան՝ անհրաժեշտ թույլտվություն ստանալու համար:
Նշենք, որ Անկարայում գիշերը ծայր առած բախումներն ավարտվել են միայն վաղ առավոտյան: Ոստիկանությունը փողոցներից հեռացրել է սադրողներն: Ձերբակալվել է ավելի քան 10 մարդ:
Այսօր, օրվա երկրորդ կեսին, Անկարայում և Թուրքիայի այլ խոշոր քաղաքներում սպասվում է բողոքի նոր ալիք: Դա պայմանավորված է իրենց պահանջների նկատմամբ վարչապետի անտարբերությամբ և այսօր ծրագրված կառավարության նիստով:
Իր հերթին տեղի մամուլը հայտնում է, որ իշխող «Արդարություն և զարգացում» կուսակցության ղեկավարությունը որոշում է ընդունել հանդիպելու Ստամբուլում Գեզի այգում ցույցի դուրս եկածների հետ՝ իրադրության կարգավորման «ճանապարհային քարտեզ» պատրաստելու համար:
Կուսակցությանը կից կստեղծվի հոգեբանների և սոցիոլոգների հանձնաժողով, որը կուսումնասիրի հանրության տրամադրություններն ու վարչապետի համար զեկույց կպատրաստի:
