ԿԲ նախագահ Արթուր Ջավադյանը այսօր Ազգային ժողովում հայտարարեց, որ իրենց կանխատեսումների համաձայն՝ այս պահին Հայաստանում, նախատեսվածի համեմատ, հնարավոր է՝ գրանցվի 2.5 տոկոսով ավելի գնաճ: Կառավարությունը կանխատեսում է 4 պլյուս մինուս 1.5 տոկոս գնաճ: Այսինքն՝ չի բացառվում, որ տարեվերջին Հայաստանում գրանցվի 8-9 տոկոս գնաճ:
Ջավադյանը այս հայտարարությունը հնչեցրեց ի պատասխան ՀՀԿ խմբակցության պատգամավոր Արտաշես Գեղամյանի այն հարցի, թե հուլիսի 7-ից գազի և էլեկտրաէներգիայի թանկացումը արդյոք բարձր գնաճ չի՞ ենթադրի: ԿԲ նախագահի խոսքով՝ ոչ միայն գազի և էլեկտրաէներգիայի թանկացումը, այլև վերջն կարկտահարությունները բացասաբար կազդեն գնաճի վրա:
Նրա խոսքով՝ սպասվող բերքատվությունը և ընդհանրապես գյուղատնտեսությունը մեծ ազդեցություն ունեն ընդհանուր գնաճի վրա: Արթուր Ջավադյանը հավաստիացրեց, որ իրենք կփորձեն իրենց գործիքներով հնարավորինս ազդել գնաճի վրա:
ՀՀ Սահմանադրության համաձայն՝ ԿԲ-ն գնաճի զսպման պատասխանատուն է:
ԿԲ նախագահը ցավով նշեց, որ իրենք միգուցե ստիպված լինեն կոշտ միջամտություն ցուցաբերել այդ առումով, օրինակ՝ բարձրացնել վերաֆինանսավորման տոկոսադրույքը:
Արտաշես Գեղամյանը հարցրեց՝ գնաճի զսպման համար ԿԲ-ի օգտագործած կոշտ դրամավարկային քաղաքականությունը արդյոք բացասաբար չի՞ ազդի տնտեսության վրա՝ ՀՆԱ-ի աճի առումով. չէ՞ որ ՀՀ կառավարությունը որդեգրել է տարեկան 6-7 տոկոս ՀՆԱ-ի աճ ապահովել: Ի պատասխան՝ Ա. Ջավադյանը նշեց, որ գնաճի զսպման համար իրենց միջամտությունները նվազագույն ազդեցությունը կունենան ՀՆԱ-ի աճի վրա:
