Թուրքական Etha լրատվական գործակալության փոխանցմամբ, «Սարը գելին – Հայկական հարցի ներքին երեսը» ֆիլմի սկանդալից հետո նմանատիպ մի նոր սկանդալ է առաջացել:
Ստամբուլի Ուսքյուդար շրջանի Բուրհան Ֆելեքի անվան վարժարանում ազգային անվտանգության դասաժամի ժամանակ ուսուցիչն աշակերտներին ցուցադրել է «հայերի ու քրդերի» կողմից սպանված թուրքերի լուսանկարները: Այս ամենն իրականացվել է ապրիլի 24-ին` Հայոց ցեղասպանության 96-րդ տարելիցի օրը:
Ուսուցիչը փորձել է 10-րդ դասարանցիներին համոզել, որ հայերն ու քրդերը «թշնամիներ ու դավաճաններ» են, սակայն աշակերտների մեծ մասը փակել է իր աչքերն ու ականջները` դրանով իսկ բոյկոտելով ուսուցչի զառանցանքը: Աշակերտների մի մասն էլ ցանկացել է լքել լսարանը, սակայն ուսուցիչն արգելել է դա անել:
Բացի այդ, աշակերտներն ուսուցչին հարցրել են, թե ովքեր և ինչու են իրականացրել 2007 թվականի հունվարի 19-ին Ստամբուլի Շիշլի թաղամասում հայկական «Ագօս» թերթի նախկին խմբագրապետ Հրանտ Դինքի սպանությունը: Ուսուցիչն անմիջապես լռեցրել է նրանց և փոխել խոսակցության թեման:
Հիշեցնենք, որ 2009 թվականին Թուրքիայի կրթության նախարարության հրահանգով թուրքական դպրոցներում ցուցադրվեց «Սարը գելին – Հայկական հարցի ներքին երեսը» խորագրով հակահայկական և Հայոց ցեղասպանությունը ժխտող ֆիլմը:
Սակայն դա առաջացրեց աշակերտների ծնողների բողոքը, քանի որ ֆիլմում կային այնպիսի դրվագներ (դիակների, կտրված գլուխների տեսարաններ), որոնք բացասական ազդեցություն են թողնում դպրոցականների հոգեկան աշխարհի վրա:
Բացի այդ, ֆիլմում առկա էր «Հայաստանի դպրոցներում նկարահանված» երդման արարողության մի կեղծ տեսարան, որի ընթացքում հայ աշակերտները, իբրև թե, երդվում են վրեժխնդիր լինել թուրքերից։