Սիրիայի ազատ բանակի գերագույն զինվորական խորհրդի ղեկավար, գեներալ Սալիմ Իդրիսը հայտարարել է, որ արաբական հանրապետության ընդդիմության ներկայացուցիչները հրաժարվում են Սիրիայի հարցով միջազգային համաժողովի մասնակցել, քանի դեռ զենքի ու զինամթերքի նոր խմբաքանակ չեն ստացել: Այս մասին հայտնում է New York Times-ը:
Իդրիսը չի հստակեցրել, թե ով պետք է զենք մատակարարի իրենց: Նրա խոսքերով՝ եթե իրենք զենք և զինամթերք չստանան՝ պատերազմում ուժերի հավասարակշռությունը փոխելու համար, ապա Ժնև չեն գնա:
Նա նշել է, որ աջակցում է համաժողովի անցկացման գաղափարին, սակայն անհանգստացած է, որ այն կարող է հակառակ արդյունքն ունենալ։
Ուրբաթ օրը Սիրիայի ընդդիմադիր և հեղափոխական ուժերի ազգային կոալիցիան հանդես էր եկել հայտարարությամբ, որում կասկած էր հայտնել ժնևյան համաժողովին իր մասնակցության նպատակահարմարության վերաբերյալ:
Ազգային կոալիցիան անհանգստություն էր արտահայտել առ այն, որ համաժողովի ժամանակ կարող է առաջադրվել մինչ 2014 թվականը իշխանության ղեկին Ասադի գտնվելու պայմանը:
