Եգիպտոսի մայրաքաղաք Կահիրեում այրել են «Ալ-Թամարուդ» ակտիվիստների շարժման շտաբ-գրասենյակը, որոնք ստորագրություններ են հավաքում նախագահ Մուհամադ Մուրսիի դեմ: Ինչպես հաղորդում է ITAR-TASS-ը՝ վկայակոչելով տեղի ԶԼՄ-ները, երկրի ղեկավարի կողմնակիցները դյուրավառ հեղուկով լի շշեր են նետել շինության վրա, ինչի հետևանքով հրդեհ է բռնկվել, որը զգալի վնաս է հասցրել:
Անցած գիշեր Բուհեյրա մարզում 16 մարդ է տուժել Մուրսիի կողմնակիցների և հակառակորդների միջև բախումների հետևանքով: Առկա տեղեկատվության համաձայն՝ բախումներին մասնակցել են նաև «Ալ-Թամարուդ»-ի ակտիվիստները:
Այս շարժումը ներկայում ստորագրություններ է հավաքում Մուրսիի դեմ: Մի քանի շաբաթների ընթացքում այն կարողացել է հավաքել 9 միլիոն ստորագրություն: Ակտիվիստները նախատեսում են դատական մարմիններ ներկայացնել ընդհանուր առմամբ 15 միլիոն ստորագրություն, ինչը մեկ միլիոնով գերազանցում է ձայների այն քանակը, որը, պաշտոնական տվյալներով, նախագահական ընտրություններին հավաքել է Մուրսին: Ակտիվիստների նպատակն է հասնել Մուրսիի հրաժարականին:
Միևնույն ժամանակ պետության ղեկավարի կողմնակիցները որոշել են հետ չմնալ իրենց «մրցակիցներից» և սկսել են ստորագրահավաք՝ հաջակցություն նախագահի: Իսլամիստների խոսքերով՝ իրենք կարող են հավաքել 50 միլիոն ձայն:
