Հունիսի 5-ին Նյու Յորքի Սուրբ Վարդան տաճարում ՄԱԿ-ում Հայաստանի դիվանագիտական ներկայացուցչության հովանու ներքո տեղի է ունեցել դաշնակահար Կարինե Պողոսյանի համերգը՝ նվիրված Արամ Խաչատրյանի ծննդյան 110-ամյակին:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ իր ողջույնի խոսքում ՄԱԿ-ում ՀՀ մշտական ներկայացուցիչ, դեսպան Կարեն Նազարյանը ներկայացրել է աշխարհահռչակ հայ կոմպոզիտորի արվեստը՝ նշելով, որ այն այսօր էլ շարունակվում է փառաբանվել աշխարհի տարբեր անկյուններում: Դեսպանը հավելել է, որ այս համերգը Նյու Յորքում հայկական մշակութային ժառանգությունը ներկայացնելու և օտարերկրյա ու սփյուռքահայ ունկնդրին հաղորդակից դարձնելու առիթ է՝ ընդգծելով, որ երաժշտությունը միավորող ուժ և հզոր միջոց է՝ գրավելու մարդկանց սրտերն ու զգացմունքները:
Համերգին ներկա են գտնվել 300-ից ավելի ունկնդիրներ, այդ թվում` ՄԱԿ-ում հավատարմագրված բազմաթիվ պետությունների դեսպաններ ու դիվանագետներ, հայ համայնքի ներկայացուցիչներ: