Ղարաբաղա-ադրբեջանական քառօրյա պատերազմի ընթացքն ու հետևանքները ստիպեցին հասարակության զգալի մասին վերլուծել, թե ուր են գնացել քաղաքացիների վճարած հարկերն ու տույժերը:
«Դուրս մեր գրպանից» նախաձեռնության անդամ Արման Սուլեյմանյանը նկատում է՝ մինչ ղարաբաղյան դեպքերը իշխանություններն անընդհատ պատճառաբանում էին, որ Հայաստանը գտնվում է պատերազմական վիճակում և երկրում առկա սոցիալական ծանր վիճակը պայմանավորված է նրանով, որ բյուջեից մեծ գումարներ հատկացվում են բանակին:
Պատժել ասելով, Սուլեյմանյանը նկատի ունի ամսական միլիոնավոր դրամների հասնող տուգանքները, որոնք «Security dream» ընկերությունը վերցնում է շարքային վարորդների գրպանից, և որի եկամուտները միանշանակ պետբյուջեն չեն հարստացնում:
Հայաստանի բոլոր քաղաքների փողոցներում, մայրուղիներում ու հատկապես Երևանում հազարավոր տեսախցիկներ ունեցող այս ընկերությունը երթևեկության վերահսկողություն կատարելու իր գործունեության սկզբում կատարել է 3 մլն 800 հազար եվրո ներդրում: Ներդրված գումարը «Security dream»-ին հաջողվել ետ բերել ընդամենը 7 ամսում:
Այս ընկերությունը 2014 թվականի ընթացքում քաղաքացիների հաշվին վաստակել է 4 մլրդ 4 մլն դրամ:
Սուլեյմանյանը ընդգծում է նաև՝ 2015 թվականին ճանապարհատրանսպորտային պատահարներն ավելացել են, ինչը ենթադրում է, որ այս ընկերությունը չի կատարում իր որդեգրած առաքելությունը և աշխատում է միայն գումար վաստակելու համար:
2011 թվականից երթևեկության վերահսկողությամբ զբաղվող «Security dream»-ը տարեկան հարկատուների գրպանից իր եկամուտներն ավելացնում է միջինը 4 մլրդ դրամով:
5 տարվա եկամուտը կազմում է մոտ 20 մլրդ դրամ` 41 մլն ԱՄՆ դոլար:
Համեմատելու համար հարկ է նկատել՝ հարկատուների հաշվին 5 տարում 40 մլն դոլար վաստակած «Security dream»-ի եկամուտներով հնարավոր էր բանակը համալրել 20 հատ Տ-90 տանկերով, 8 հատ անօդաչու սարքերով կամ օրինակ՝ 40 հատ ԲՄ-21 «Գրադ» տեսակի հրթիռահրետանային համակարգերով:
