Հայաստանի ազգային հավաքականի ավագ Հենրիխ Մխիթարյանը հույս է հայտնել, որ այս անգամ Դորտմունդի «Բորուսիա»-ին կհաջողվի հաղթել Գերմանիայի գավաթի խաղարկությունում:
Դորտմունդիցիները գավաթի խաղարկության կիսազրափկչում առավելության հասան Բեռլինի «Հերտա»-ի նկատմամբ, իսկ Մխիթարյանը խփեց իր թիմի վերջին գոլը՝ հաշիվը դարձնելով 3:0 հաշվով:
«Իհարկե, արժանի էինք հաղթանակի, քանի որ շատ լավ խաղացինք: Չեմ կարող պատկերացնել, որ կարող էինք ավելի լավ խաղալ: 3:0 հաշիվը մեզ համար լավագույնն էր: Արժանի էինք եզրափակչի ուղեգիր նվաճել:
Երկու օրից շատ բարդ խաղ է սպասում «Շտուտգարտ»-ի դեմ: Պետք է պահպանել բարձր տրամադրությունը ու առաջ շարժվել:
Հուսով եմ` այս անգամ կստացվի նվաճել գավաթը: Նախորդ երկու տարիներին չկարողացանք հաղթել եզրափակչում: Բայց այս անգամ ամեն ինչ կանենք, որ երրորդ անգամից ստացվի: Ինչպես գիտեք Աստված երրորդություն է սիրում:
Հուսով եմ` «Բավարիա»-ի դեմ եզրափակիչ խաղում էլ գոլի հեղինակ կդառնամ: Կարևոր է ամեն խաղում գոլի հեղինակ դառնալ ու մեծ հաճույք է հաղթել յուրաքանչյուր խաղում, այդ թվում նաև եզրափակչում: Այնպես որ կանենք ամեն ինչ լավ խաղալու ու հաղթելու համար»,-ասել է Մխիթարյանը:
