Մադրիդյան սկզբունքների վրա այսօր չենք կարող հենվել, կամ էլ այդ սկզբունքները պիտի վերանայվեն. «Առաջին լրատվական»- ի հետ զրույցում ասաց ՎՍԴՀԿ ատենապետ, ԱԺ պատգամավոր Լյուդմիլա Սարգսյանը: Նրա դիտարկմամբ՝ անհրաժեշտ է ճանաչել ԼՂ անկախությունը, և ավելի նպաստավոր իրավիճակ, քան հիմա է, մենք այլևս չենք կարող ունենալ. «Ես հասկանում եմ, որ իշխանությունների, Սերժ Սարգսյանի կողմից երբեմն հայտարարություններ են արվում, որն ուղղված է ոչ միայն մեր լսարանին, այլ նաև արտաքին աշխարհին, բայց ես այն կարծիքին եմ, որ այն, ինչ որ հնչում է, նաև քայլեր պետք է կատարվեն այդ ուղղությամբ»:
Լ. Սարգսյանի կարծիքով՝ եթե մենք ցանկանում ենք, որ մեզ հետ հաշվի նստեն, քայլեր պետք է կատարել, որպեսզի աշխարհը հասկանա, որ մենք կատակ չենք անում, որ կարող ենք գնալ ծայրահեղ քայլերի. «Եթե իրենք կարող են խաղալ Հայաստանի և Ադրբեջաի միջև, ապա դա մեզ համար խաղ չէ, կենաց-մահու կռիվ է»:
Անդրադառնալով վերջին շրջանում կարծես թե վերանայվող հայ-ռուսական հարաբերություններին՝ Լ. Սարգսյանը նշեց, որ շատ արևմտամետ գործիչներ հիմա թիրախավորել են Ռուսաստանը: Սակայն, նրա կարծիքով, դա վտանգավոր գործընթաց է, որից պետք է դուրս գալ կամ չափը պահպանել. «Թիրախավորել մի երկիր, որը հայ-թուրքական սահմանն է պահում, առնվազն լուրջ չէ»:
Մանրամասները՝ տեսանյութում:
