Իսրայելական հրամանատարությունը տանկեր է ուղարկել Սիրիայի հետ բաժանարար գիծ, որին հարակից տարածքում արդեն մոտ մեկ օր է՝ կատաղի պայքար է մղվում Կունեյտրա սահմանային քաղաքի համար: Այս մասին հայտնում է Al-Arabiya-ն:
Մարտերը սկսվել են հունիսի 6-ի գիշերը, երբ սիրիացի ապստամբները հարձակում էին իրականացրել Գոլանի բարձունքում գտնվող քաղաքի և համանուն անցակետի վրա: Կառավարական զորքերը հակագրոհ էին կազմակերպել՝ վերադարձնելով կորցրած դիրքերը:
BBC-ի տվյալներով՝ կառավարական ուժերը հարձակման ընթացքում զրահատեխնիկա են կիրառել, սակայն այդ շրջանում սիրիական ավիացիա չի նկատվել:
Իսրայելցիները, որոնց դիրքերը գտնվում են քաղաքից մի քանի հարյուր մետր հեռավորության վրա, հայտնել են, որ ուշադիր հետևում են իրադարձություններին, սակայն դեռևս չեն միջամտում: Իսրայելական կողմում գտնվող ականատեսները նշում են, որ մարտերը դեռևս շարունակվում են, լսվում են կրակոցներ, բարձրանում են ծխի սյուներ:
Ինչպես ավելի վաղ հաղորդվել էր, մարտերի ընթացքում ՄԱԿ-ի մեկ խաղաղապահ է տուժել: «Կապույտ սաղավարտների» բազայի տարածքում ական է պայթել:Բացի այդ, իսրայելցիներն իրենց հիվանդանոցներ են տեղափոխել սիրիական կառավարական բանակի զինծառայողների: Քաղաքի և անցակետի համար մարտում զոհվածների ու տուժածների հստակ թիվ հայտնի չէ:
