Թուրքական Anadolu լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը դատապարտել է եվրաինտեգրման ոլորտում Թուրքիայի առաջընթացի մասին Եվրոպական խորհրդարանի ընդունած զեկույցը, որը նա որակել է որպես «հայամետ»:
«Մեր դժգոհությունը հարուցել է ոչ թե բուն Եվրախորհրդարանը, այլ այն, որ զեկույցը զուրկ է կառուցողական մեկնարկից:
Այն ժամանակ, երբ ԵՄ-ի հետ Անկարայի հարաբերությունները բազում հարցերի շուրջ առաջ են գնում դրական հունով, ինչպիսիք են միգրացիոն ճգնաժամը, ԵՄ-ին Թուրքիայի անդամակցության գործընթացում բանակցային նոր գլուխները, վիզային ռեժիմի չեղյալ հայտարարումը, մենք բախվում ենք կանխակալ զեկույցի:
Դա սադրիչ մոտեցում է: Եվրոպացիները հավանաբար իրենք կհասկանան դա: Ես հույսեր եմ կապում դրա հետ: ԵՄ-ն ավելի շատ ունի Թուրքիայի կարիքը, քան Թուրքիան՝ ԵՄ-ի»,- ասել է Էրդողանը:
Նա նկատել է, որ Եվրոպական խորհրդարանի զեկույցում հիշատակված է Հայոց ցեղասպանության (իր խոսքերով՝ 1915 թվականի դեպքերի մասին), ինչն անընդունելի է իրենց համար, և իրենք նախորդ տարվա զեկույցի նման ոչինչ չպարտադրող այդ զեկույցը վերադարձրել են Եվրոպական խորհրդարանին:
Ավելի վաղ Թուրքիայի՝ Եվրամիության հարցերով պետնախարար Վոլքան Բոզքըրը հայտարարել էր, որ իրենք չեն ընդունում Թուրքիայի վերաբերյալ Եվրոպական խորհրդարանի զեկույցն ու վերադարձնելու են այն:
