Սպիտակ տան մամլո քարտուղար Ջոշ Էռնեստը հայտարարել է, որ ԱՄՆ վարչակազմը դեմ է Սիրիայում ոչ թռիչքային գոտի ստեղծելուն, հայտնում է RIA Novosti-ն:
«Դա անկասկած պահանջում է ցամաքային ուժերի ներգրավում, որը, ինչպես վստահ է նախագահ Օբաման, չի բխում մեր ազգային անվտանգության շահերից»,- ասել է նա:
Էռնեստն ավելացրել է, որ այդպիսի գոտիներ ստեղծելու իմաստ չկա, քանի որ ԴԱԻՇ ահաբեկչական խմբավորումն ավիացիայի օգտագործմամբ հարձակումներ չի իրականացնում:
Մամլո քարտուղարը նաև ավելացրել է, որ երկրում հումանիտար իրավիճակի լավացման տեսանկյունից ավելի կարևոր է ոչ թե ստեղծել ոչ թռիչքային գոտիներ, այլ պահպանել հրադադարը, որի շնորհիվ վերջին երկու ամսվա ընթացքում հաջողվել է անել ավելին, քան դրանից առաջ ամբողջ ժամանակահատվածում:
Ջոշ Էռնեստն անվանել է Սիրիայի խնդրի այլ կարևոր լուծում`դա կառավարության և ընդդիմության միջև հակամարտության քաղաքական կարգավորումն է:
«Ոչ թռիչքային գոտիներ ստեղծելը մեզ չի մոտեցնի այդ խնդիրների լուծմանը: Ընդհանուր առմամբ դա կարող է հանգեցնել Սիրիայի մասերի բաժանմանը: ԱՄՆ-ն և մյուս երկրները, որոնք կենտրոնացած են Սիրիայի վրա, նպատակ են դրել պահպանել այդ պետության ներկա սահմանները, նույնիսկ, եթե այն այժմ ենթարկվում է այդքան ցնցումների»,- եզրակացրել է պաշտոնյան:
