Լեհաստանի նախկին նախագահ Լեխ Վալենսան TVN հեռուստաալիքի եթերում հայտարարել է բարիկադներում երկրի գործող ղեկավարության դեմ պայքարելու պատրաստակամության մասին:
«Երբ այս դեմագոգիան և պոպուլիզմը իրենց չարդարացնեն և մարդիկ հասկանան՝ ինչպես են դրանք վնասում Լեհաստանին, այդ ժամանակ պետք է տղամարդկային որոշում ընդունել: Եվ, ամենայն հավանականությամբ, ես այն կընդունեմ, և մենք վերջ կդնենք այս կառավարության գործունեությանը, որն այսպիսի վնաս է հասցնում Լեհաստանին»,- նշել է քաղաքական գործիչը:
Այսպես Վալենսան մեկնաբանել է ապրիլի 13-ին Եվրախորհրդարանի ընդունած բանաձևը Լեհաստանում իրավիճակի վերաբերյալ: Եվրապատգամավորները քննադատել են երկրում ստեղծված սահմանադրական կարգը և պահանջել են պահպանել դեմոկրատական պետության նորմերը:
«Դա ցավալի է: Ես ամաչում եմ, որ դա տեղի է ունենում»,- նշել է Վալենսան: Նա հավելել է, որ իշխանության ներկայացուցիչներին պետք է անհապաղ պաշտոնից հեռացնել:
Փետրվարի 4-ին Լեհաստանում, չնայած իրավապաշտօանների քննադատությանը, ընդունվել է հետախուզության վերաբերյալ օրենք: Փաստաթուղթն ընդլայնում է հատուկծառայությունների լիազորությունները, նրանց ավելի մեծ հասանելիություն տալիս տեղեկության էլեկտրոնային կրիչներին, մեղմացնում է երկրի քաղաքացիներին գաղտնալսումից պաշտպանող ձևակերպումները:
Հունվարի 7-ին ուժի մեջ են մտել ԶԼՄ-ների մասին օրենքի փոփոխությունները, որոնց համաձայն՝ հանրային հեռարձակողների ղեկավարները կնշանակվեն ու կհեռացվեն անմիջապես կառավարության կողմից։
