Հայաստանի ֆուտբոլի ազգային հավաքականի և ռուսաստանյան 1-ին դիվիզիոնում հանդես եկող Նիժնի Նովգորոդի «Վոլգա»-ի հարձակվող Արթուր Սարկիսովը մասնակցել է իր թիմի հերթական խաղին: Սարկիսովը կրկին խաղադաշտ է դուրս եկել իր թիմի մեկնարկային կազմում և անցկացրել ամբողջական խաղ:
Ռուսաստանի առաջին դիզվիզիոնի 31-րդ տուրում «Վոլգան» հյուրի կարգավիճակով մրցակցել է «Զենիթ 2»-ի հետ: Հանդիպման 12-րդ րոպեին դաշտի տերերն առաջ են անցել հաշվի մեջ, սակայն «Վոլգա»-ի ֆուտբոլիստներին 2-րդ խաղակեսում հաջողվել է պատասխան գնդակ խփել: Ինչ վերաբերում է Սարկիսովին, ապա վերջինս հանդիպման 27-րդ րոպեին դեղին քարտ է ստացել:
Հանդիպման վերջին 13 րոպեները «Զենիթ 2»-ի ֆուտբոլիստները ստիպված են եղել անցկացնել 10 հոգով: Երկրորդ դեղին քարտը ստանալով` խաղադաշտից հեռացվել էր Յուրի Բավինը:
Հատկանշական է, որ երկրորդ խաղակեսում «Վոլգա»-ի խաղը զգալիորեն փոփոխվել է, երբ դաշտ է դուրս եկել Արթուր Մինոսյանը: Հայազգի կիսապաշտպանն աչքի է ընկել գրագետ խաղով:
Ոչ-ոքին «Վոլգա»-ին հնարավորություն է տվել միառժամանակ գտնվել մրցաշարային աղյուսակի 9-րդ տեղում: Նիժնի Նովգորոդի ներկայացուցիչը 5-րդ անընդմեջ խաղն է, ինչ չի պարտվում և արդեն ունի 43 միավոր:
