ՌԴ Պետդումայի նախագահ Բորիս Գռիզլովը, որը նաև իշխող «Եդինայա Ռոսիա» կուսակցության բարձրագույն խորհրդի նախագահն է, այսօր հայտարարել է, որ խորհրդարանի վերին պալատի նախագահ Սերգեյ Միրոնովը պետք է հանձնի մանդատը: Այս մասին նա ասել է կուսակցության պաշտոնական կայքին տված հարցազրույցում:
Նա նշել է, որ Միրոնովը ներկայացնում է Սանկտ Պետերբուրգի օրենսդիր մարմինը, որտեղ գերակշռող մեծամասնություն են կազմում «Եդինայա Ռոսիա» կուսակցության պատգամավորները: «Եթե նա թույլ է տալիս ոչ թե իշխանության մարմնի հետ անհամաձայնություն, այլ փաստացի հակադրում է իրեն և իր դիրքորոշումը քաղաքային իշխանություններին, ապա ճիշտ չի՞ լինի, որ հանձնի մանդատը: Թող որ նա փնտրի այնպիսի իշխանություն, որը պատրաստ է ներկայացնել»,- ասել է Գռիզլովը:
Միրոնովի գլխին սև ամպերը կուտակվել են այն բանից հետո, երբ իր կուսակցության վերջին համագումարի ժամանակ քննադատել էր իշխող կուսակցությանը` հայտարարելով, որ առաջիկա նախագահական ընտրությունների ժամանակ, որոնք կայանալու են հաջորդ տարվա մարտին, իր «Արդար Ռուսաստանը» չի աջակցելու «Եդինայա Ռոսիա»-ի թեկնածուին: