Նոր Ընտրական օրենսգրքի նախագծի համաձայն՝ վերջին մարդահամարի տվյալներով Հայաստանում առավել մեծ համայնք ունեցող չորս ազգային փոքրամասնությունների` եզդիների, ռուսների, ասորիների և քրդերի ներկայացուցիչները պարտադիր պետք է ընդգրկված լինեն քաղաքական ուժերի համամասնական ցուցակներում:
Այս դրույթն արդեն իսկ ազգային փոքրամասնություններին տարբեր համայնքների համար մտահոգության ու տարաձայնության պատճառ է դարձել։
Հայաստանի եզդիների ազգային միության նախագահ Ազիզ Թամոյանն արդեն իսկ գրություն է ուղարկել հանրապետության նախագահ Սերժ Սարգսյանին, վարչապետին, Ազգային ժողովի նախագահին, շեշտելով՝ եզդիներն ամենամեծ համայնքն ունեցող ազգային փոքրամասնությունն են Հայաստանում և պետք չէ նրանց մյուսների հետ համեմատել ու նույն քանակությամբ տեղեր հատկացնել խորհրդարանում։
Մինչդեռ, Հայաստանի քրդական ազգային խորհրդի նախագահ Կնյազ Հասանովը «Առաջին լրատվական»-ի հետ զրույցում ասում է՝ վերջին մարդահամարի տվյալներով Հայաստանում շուրջ 2500 քուրդ կա և իրենք ևս անմասն չեն մնա առաջիկա ընտրություններին մասնացկությունից, սակայն ներկայացված նախագծի վերաբերյալ որոշ մտահոգություններ ունեն։
Ազգային փոքրամասնությունները դեռևս չեն կողմնորոշվել՝ որ կուսակցության ցուցակով կմասնակցեն 2017 թվականի խորհրդարանական ընտրություններին, սակայն շեշտում են՝ թեպետ բոլորի հետ ունեն լավ հարաբերություններ, բայց իրենք իրենց խնդիրներով մշտապես իշխանություններին են դիմել՝ այս անգամ էլ երես չեն կարող թեքել։
Հայաստանի «Աթուր» ասորական ասոցիացիայի նախագահ Արսեն Միխայլովը «Առաջին լրատվական»-ի հետ զրույցում չհստակեցրեց՝ որ կուսակցության ցուցակով կմասնակցեն ընտրություններին, ասաց․ «Առայժմ միայն քննարկումներ են տանում, և առաջիկայում որոշում կկայացնեն»։
