«Ճայթրուկը պահել էի ձեռքիս վրա՝ զգեստի տակ». խաղադաշտ մտած երկրպագուն մանրամասներ է պատմում

Հայաստան – Բելառուս ընկերական խաղի 73-րդ րոպեին խաղադաշտ դուրս եկավ երկրպագու՝ ճայրուկը ձռքին. ՖԱՖ-ի անդամ Հայկ Բաբայանն էր: 1in.am Sport-ի հետ զրույցում Հայկը մանրամասներ է պատմել:

Ե՞րբ էիր ծրագրել, որ դուրս ես գալու խաղադաշտ:

Ծրագրել էի խաղադաշտ մտնել գրեթե 1 ամիս առաջ՝ մարտի 2-ին:

Ինչպե՞ս հաջողվեց ճայթրուկը մտցնել խաղադաշտ: Մուտքի մոտ հսկողությունն ուժեղ էր:

Մարզադաշտ մտնելիս այն ինձ վրա էր, իսկ խաղադաշտ դուրս գալուց առաջ պահել էի ձեռքիս վրա՝ զգեստի տակ: Ամեն ինչ շատ արագ ստացվեց, ես էլ չհասկացա՝ ինչպես: Երբ դուրս եկա խոտածածկի վրա, հագուստի տակից հանեցի ճայթրուկը, քաշեցի թելն ու վառեցի այն:

Ինչպե՞ս հաջողվեց ճեղքել անվտանգության աշխատակիցների պատը, որոնք հսկողություն էին իրականացնում:

Նկատեցի, որ բոլոր կողմերում հսկողությունը հագեցած է, և հասկացա, որ պետք է գործել արագության վրա: Տրիբունայում փոխեցի տեղս, մոտեցա ճաղավանդակին, որի վրայից անցնելուց հետո մոտ 1 մետր բարձությամբ պատից ցատկեցի դեպի խաղադաշտ: Անվտանգության աշխատակիցներն անմիջապես արձագանքեցին ու սկսեցին վազել դեպի ինձ, սակայն նրանց միջև առկա ճեղքով արդեն անցել էի մոտենում էի խոտածածկին:

Ի՞նչ կասեք ժեստի հետ կապված և ում էր այն ուղղված:

Այն ամենն, ինչ կատարվեց խաղադաշտում և բոլորը տեսան, ուղղված էր Ռուբեն Հայրապետյանին ու ֆուտբոլի ֆեդերացիայի գործկոմին, հայկական ֆուտբոլի նկատմամբ նրանց անպատասխանատու վերաբերմունքին, ինչպես նաև ՖԱՖ-ի նկատմամբ ճնշումներին:

Ի՞նչ տեղի ունեցավ, երբ դուրս բերեցին խաղադաշտից:

Թևերս ոլորած տարան բաժանմունք, որից հետո փորձում էին հարցաքննել: Հարցրին՝ ուղղվա՞ծ էր արդյոք Հայրապետյանի դեմ, գլխի շարժումով դրական պատասխան տվեցի: Մյուս հարցերին ընդհանրապես չեմ պատասխանել: Հրաժարվեցի նաև գրել զեկույցը, անգամ հրաժարվեցի գրել, որ հրաժարվում եմ գրել զեկույց: Ստորագրեցի ներկայացված զեկույցը, որից հետո ազատ արձակվեցի: Դիմավորեցին ՖԱՖ-ականներն ու էլի մի խումբ երկրպագուներ:

Հետագայում ի՞նչ ակցիաներ եք ծրագրում:

Ժամանակը ցույց կտա, սակայն իմ համոզմունքներից ու պահանջներից չեմ հրաժարվում:

 

Լուսանկարը՝ Photolure-ի