«Արմավիա» ավիաընկերության շուրջ 40 աշխատակիցների «Արմավիա»-ն խոստացավ վճարել դեռևս 2012թ. նոյեմբերից չվճարած աշխատավարձերը: Այսօր «Արմավիա» ավիաընկերության արդեն նախկին մի քանի տասնյակ աշխատակիցներ բողոքի ակցիա անցկացրին նաև Միխայիլ Բաղդասարովին պատկանող «Միկա Լիմիթեդ» ընկերության գրասենյակի առջև՝ պահանջելով գործարարի հետ հանդիպում: Սակայն հանդիպումը չկայացավ, քանի որ գրասենյակի դռները փակվեցին աշխատակիցների առջև:
Փոխարենը քիչ անց լրագրողների հետ զրուցեց «Արմավիա» ավիաընկերության մամուլի պատասխանատու Նանա Ավետիսովան: Վերջինս տեղեկացրեց, որ ինչպես «Արմավիա»-ն ունի պարտքեր, այնպես էլ «Արմավիա»-ին են պարտք: Իսկ այդ պարտքերը, նրա հավաստիացմամբ, ուշացնում են «Արմավիա»-ի տարբեր ներկայացուցչությունները, ընկերություններ և գործակալություններ: Նանա Ավետիսովայի խոսքով՝ «Արմավիա»-ն վաճառում է իր ունեցվածքը, ինքնաթիռները, որի գումարներով էլ առաջիկայում կսկսի վճարել բոլոր պարտքերը: Ավետիսովան ասաց, որ ինքը ևս «Արմավիա»-ի աշխատակից է, և լավ է հասկանում մյուս աշխատակիցների բողոքը:
Նրա խոսքով՝ եթե նույնիսկ ընկերությունը սնանկ ճանաչվի, առաջիկայում բոլոր աշխատավարձերը կվճարվեն: «Արմավիա»-ի մամլո պատասխանատուն բողոքի ակցիա կազմակերպած աշխատակիցներին և լրագրողներին փոխանցեց «Արմավիա»-ի ղեկավարության խոսքը՝ աշխատավարձերը կվճարվեն հունիսի 7-ից սկսած: Թե աշխատավարձի որ մասը՝ նա չկարողացավ ասել:
Նանա Ավետիսովան չկարողացավ պատասխանել աշխատակիցների շատ հարցերի ու դժգոհությունների՝ ասելով, թե այդ հարցերին պետք է պատասխանի ֆինանսիստը և այլն:
«Արմավիա»-ի աշխատակիցներին ընդունեց նաև «Արմավիա» ընկերության գլխավոր տնօրեն Նորայր Բելոյանը: Նա կրկնեց այն, ինչ ասել էր Նանա Ավետիսովան: Հետո աշխատակիցներից մի քանիսն «Առաջին լրատվական»-ի հետ զրույցում ասացին, որ չեն հավատում այս խոստումներին, քանի որ նման բաներ շատ են լսել:
Հիշեցնենք, որ առավոտյան «Արմավիա»-ի շուրջ 50 աշխատակիցներ ակցիա անցկացրին ՀՀ նախագահ Սերժ Սարգսյանի նստավայրի մոտ՝ պահանջելով իրենց վերջին ամիսների չվճարված աշխատավարձերն ու ռեալ աշխատանք, որպեսզի չարտագաղթեն երկրից: Նրանք իրենց դիմումը հանձնեցին ՀՀ նախագահի ընդունարանում և ստացան պատասխան, համաձայն որի՝ մեկ շաբաթվա ընթացքում դրան կարձագանքեն: