Բրիտանական բարեգործական կազմակերպությունը, որը օգնում է վետերաններին, հրաժարվել է ծայրահեղ աջակողմյանների նվիրատվությունից, որոնք սկսել էին գումար հավաքել Լոնդոնում իսլամիստների կողմից զինվորականի սպանությունից հետո:
Զինծառայող Լի Ռիգբին սպանվել էր մայիսի 22-ին՝ երկու իսլամիստների կողմից: Սպանությունը որակվել էր որպես քաղաքական և ահաբեկչություն էր համարվել: Միջադեպն առաջացրել էր հակաիսլամական տրամադրությունների պոռթկումներ, հարձակումներ մզկիթների վրա և հակամիգրացիոն տրամադրությունների բարձրացում հասարակության շրջանում:
«Մենք քաղաքական կազմակերպություն չենք, մենք չենք ցանկանում ծայրահեղական համարվող կառույցներից գումար վերցնել: Այդ կանոնը գործում է բոլոր կազմակերպությունների համար: Մենք բարեգործական կազմակերպություն ենք և քաղաքականությամբ չենք զբաղվում»,- նշել է Help for Heroes-ի ղեկավար Բրին Փերին։
Նրա խոսքերով՝ նմանատիպ բոլոր միջոցները հետ են վերադարձվելու: