Շվեդիայում գազ սպառողների համար երկնագույն վառելիքի մեկ խորանարդ մետրի արժեքը 2012-ի վերջի դրությամբ ռուսական արժույթով կազմել է 52.9 ռուբլի (1000 խորանարդ մետրը՝ 1700 դոլար): Դա գազի ամենաբարձր սակագինն է Եվրոպայի 32 երկրների շարքում: Ռուսաստանը վարկանիշում 29-րդ տեղում է: Այս մասին են վկայում «ՌԻԱ Ռեյտինգի» փորձագետների տվյալները՝ փոխանցում է RIA Novosti-ն:
Փորձագետները նշում են, որ գազի սակագինը երկրների մեծ մասում էապես շեղվում է բորսային և պայմանագրային ցուցանիշներից՝ ինչպես դրական, այնպես էլ բացասական ուղղությամբ: Արդյունքում սպառողների կողմից վճարվող սակագները տարբեր են:
Երկրորդ տեղում Դանիան է, որտեղ բնակչությունը մեկ խորանարդ մետրի համար վճարում է 45.2 ռուբլի: Երրորդ և չորրորդ տեղերում են Հունաստանը (42.4 ռուբլի) ու Իտալիան (40.4 ռուբլի): Նրանց հաջորդում են Իսպանիան և Պորտուգալիան (38 և 35.5 ռուբլի):
Վարկանիշի վերջին տեղում Ղազախստանն է, որտեղ բնակիչները մեկ խորանարդ մետր գազի համար վճարում են 2.1 ռուբլի: Երկրորդ տեղում Բելառուսն է (2.6 ռուբլի), երրորդում՝ Ուկրաինան (3.6 ռուբլի):
Բնակչությանը մատակարարվող գազի սակագնի աճի ցուցանիշով առաջատաը 2012-ին Իսպանիան էր, որտեղ գազը թանկացել է մոտ 70 տոկոսով: Թուրքիայում և Խորվաթիայում գազն անցած տարի թանկացել է համապատասխանաբար 39 և 27 տոկոսով: