Երևանի քաղաքապետ Տարոն Մարգարյանն այսօր հայտարարել է, որ քաղաքային իշխանությունները պետք է լինեն առկա խնդիրներն առաջինը վեր հանողն ու շտկողը: Մարգարյանի գործունեության մեջ այս տրանսֆորմացիան արդեն նկատվում է բավական երկար ժամանակ: Նա խորհրդակցություններ է անցկացնում գրեթե ամենժամյա ռեժիմով և դրանցում քննադատում քաղաքային իշխանությունների արդյունավետությունը, մատնանշում խնդիրներ, տալիս քաղաքացիների համար բավական դուրեկան հանձնարարություններ:
Այսօր, օրինակ, նա խոսել է իրենց տները չսեփականաշնորհած բնակիչներին անհատույց հնարավորություն տալու մասին: Անզեն աչքով էլ տեսանելի է, որ Տարոն Մարգարյանը զբաղված է նախընտրական արշավով: Պարզապես պարզ չէ, թե հատկապես ում համար, կամ որ ընտրությունների՝ 2017-ի խորհրդարանակա՞ն, թե՞ նույն թվականին կայանալիք քաղաքապետի ընտրությունների համար:
Ամենայն հավանականությամբ, մեկը բխելու է մյուսից, և կախված այն բանից, թե Տարոն Մարգարյանն ինչպես կաշխատի 2017 թվականի խորհրդարանական ընտրությունների համար, Սերժ Սարգսյանը որոշում կկայացնի որպես քաղաքապետ նրա աշխատանքը շարունակելու նպատակահարմարության, այսինքն՝ քաղաքապետի ընտրություններում Տարոն Մարգարյանի թեկնածությունը թողնելու մասին:
Տարոն Մարգարյանի խնդիրն է Երևանում ստեղծել մի իրավիճակ, երբ ՀՀԿ-ն կկարողանա հնարավորինս քիչ «արյունով» հնարավորինս շատ ձայներ հավաքել: Խնդիրն այն է, որ Երևանը ավանդաբար իշխանությունների Աքիլլեսյան գարշապարն է համապետական ընտրությունների ժամանակ: Այստեղ դժվար է ընտրություններ կեղծելը, թվեր նկարելը՝ մի շարք հանգամանքներից ելնելով: Պատահական չէ, որ վերջին համապետական ընտրություններում թվանկարչության ծանրության կենտրոնը տեղափոխվել է գյուղեր, գյուղական համայնքներ: Երևանում խնդիրն առավել բարդանում է այն պատճառով, որ ընտրություններն այլևս լինելու են համամասնական ընտրակարով, և մեծամասնականի գործոնը զգալիորեն թուլանում է: Իսկ նկատի ունենալով նաև այն, որ գործ ունենք խորհրդարանական մոդելի հետ, խնդիր է դառնում նաև միայն գյուղական համայնքների հաշվին ցանկալի արդյունք ապահովելը, հետևաբար ՀՀԿ-ի համար Երևանի կարևորությունն ավելի է մեծանում: Դրա համար էլ Տարոն Մարգարյանը դարձել է ՀՀԿ նախընտրական արշավի առաջամարտիկը: Նրա գործունեության արդյունքից էլ կախված կլինի, թե ինչ հեռանկար ունի քաղաքապետի պաշտոնում: Առավել ևս, որ ՀՀԿ-ում արդեն իսկ ուրվագծվում են այլընտրանքային թեկնածուներ, ինչով Սերժ Սարգսյանը Մարգարյանին ցույց է տալիս, որ ամենափոքր վրիպումն անգամ կարող է դառնալ ճակատագրական, քանի որ թեկնածուի պակաս ՀՀԿ-ում չկա:
Մյուս կողմից, սակայն, այս հանգամանքը առաջ է բերում մեկ այլ խնդիր: Թեկնածուները, որոնք գուցե այսօր ընդամենը ունեն Տարոն Մարգարյանին զգոն պահելու ֆունկցիա, ըստ էության հանդիսանում են նրա սխալներում և վրիպումներում շահագրգռված անձինք, որոնք բնականաբար կփորձեն ամենափոքր հնարավորությունն անգամ օգտագործել այդ վրիպումներն ապահովելու համար:
Ըստ էության, Տարոն Մարգարյանը փաստորեն դարձել է խորհրդարանական ընտրություններում Երևանի արդյունքի գլխավոր պատասխանատու, թեկուզ դե ֆակտո: Իսկ սա նշանակում է, հաշվի առնելով հայաստանյան իշխանական համակարգի հարաբերությունների բնույթն ու այդ համակարգում հատկապես այժմ առկա վերադասավորումների թեժ շրջանը, որ բոլորի համար գտնված է Երևանի համար պատասխանատվությունը դուրս գրելու օբյեկտ: Մեծ հաշվով, եթե սահմանադրական փոփոխություններում այդ օբյեկտը ՀՀԿ շտաբի պետ Հովիկ Աբրահամյանն էր, ապա խորհրդարանական ընտրություններում այն կա՛մ Տարոն Մարգարյանը կլինի, կա՛մ կլինի Մարգարյանի «համանախագահություն»:
